Elorda polıtseıleri qyzmeti barysynda qaza tapqan tártip saqshylarynyń analarymen kezdesti

NUR-SULTAN. QazAqparat - Alǵys aıtý kúnine oraı Nur-Sultan qalalyq Polıtsııa departamentiniń qyzmetkerleri qyzmettik mindetterin oryndaý kezinde qaza tapqan polıtseılerdiń analarymen kezdesti, dep habarlaıdy QazAqparat PD baspasóz qyzsmetine silteme jasap.

Polıtsııa qyzmetkerleri Evgenıı Kretanyń anasy – Olga Verbına jáne Sergeı Pavlovtyń anasy- Olga Pavlovanyń úıine baryp alǵys aıtty. «Elordalyq departament qaza tapqan qyzmetkerlerdiń týǵan-týysqandary men jaqyndary týraly jáne quqyqtyq tártipti saqtaýda olardyń jasaǵan erlik isterin eshqashan umytpaıdy. Óıtkeni olardyń uldary qyzmettik mindetterin oryndaý barysynda óz ómirlerin qıdy», delingen habarlamada.

1997 jyly 19 sáýirde Evgenııı Kreta men Sergeı Pavlov ekeýi birge sýǵa batyp bara jatqan tórt balany qutqarmaqshy bolyp, Esil ózenine túsken. Olar batyp bara jatqan balalarǵa tez jetip, eki ret jaǵaǵa shyǵarýǵa tyrysqan. Biraq muzdaı aǵyn sý alty adamnyń ómirin qıyp ketti.

Qazaqstan Respýblıkasy Prezıdentiniń 1998 jylǵy 6 mamyrdaǵy Jarlyǵymen marqumdar - Evgenıı Kreta jáne Sergeı Pavlov «Erligi úshin» medalimen marapattaldy.

Departament basshysy laıyqty uldardy tárbıelep ósirgen jáne ustamdylyq pen batyldyqtyń úlgisi bolǵan erlikteri úshin analarǵa erekshe alǵys bildirdi.

Sonymen qatar, ol analardy kele jatqan 8-naýryz merekesimen quttyqtaı otyryp, olarǵa zor densaýlyq tiledi jáne departament tarapynan qoldaý kórsetiletinine senim bildirdi.