Elorda oqýshylary UOS ardagerlerimen kezdesti

ASTANA. QazAqparat - Astana qalasynyń № 63 orta mektebinde 1-synyp oqýshylary úshin Uly Otan soǵysyndaǵy Jeńistiń 70 jyldyǵyna arnalǵan ashyq sabaq ótkizildi.

Bul týraly elorda ákimdiginiń baspasóz qyzmetinen habarlady. Atalmysh shara orta mekteptiń muǵalimderimen, Astana qalasy ákimdiginiń eskertkishter men tarıhı-mádenı murany saqtaý dırektsııasynyń qyzmetkerlerimen uıymdastyryldy.

Sabaqqa UOS ardagerleri Qurmantaı Aıtjanov, Leonıd Kartaýzov, Sıhymbaı Mamyrov jáne Alekseı Frolov, sonymen qatar ata-analar, ustazdar, BAQ ókilderi qatysty.

«Bizdiń balalar osy beıbit kúnderge kimderdiń arqasynda jetkenimizdi bilýleri úshin ashyq sabaqty uıymdastyrdyq. Balalardyń ardagerlermen etene tanysqandaryn qaladyq», - deıdi №63 orta mekteptiń bastaýysh synyp muǵalimi Ýálıeva Gúlmıra.

Sabaq barysynda oqýshylar toptyq saıystarǵa, esep saıystaryna qatysty. Ár oqýshy UOS ardagerin somdap, sahnalyq óner kórsetýge tyrysty.

Sonymen qatar, oqýshylar Otan úshin qan maıdan keshken ardagerlerdiń estelikterin tyńdady.

«Men óskeleń urpaqqa qarap qýanamyn. Bizdiń jastar baqytty, olarǵa kóp múmkindik berilgen. El basyna kún týsa Otanyn jaýdan qorǵaı alatyn urpaǵymyz bar dep bilemin», - dedi UOS ardageri Alekseı Frolov.