Elorda men Almatyda koronavırýsqa PTR-testileý ýaqytsha júrgizilmeıdi

NUR-SULTAN. QazAqparat - «Olımp» zerthanalar jelisi Almaty men Nur-Sultanda ýaqytsha PTR-testileý ótkizbeıdi, dep habarlaıdy QazAqparat kompanııaǵa silteme jasap.

19-21 maýsym aralyǵynda Almaty qalasynda jáne 19-23 maýsym kúnderi Nur-Sultan qalasynda zerthanalar koronavırýsty anyqtaıtyn PTR-testileýge analız qabyldamaıdy.

«Oǵan sebep - zerthanalarda júrgiziletin profılaktıkalyq jumystar. 22 maýsymda Almatyda testileý qaıta bastalady. Al 24 maýsymda Nur-Sultanda PTR-testileýge ótinim qabyldana bastaıdy. Osyndaı qolaısyzdyq úshin keshirim suraımyz» delingen kompanııa taratqan habarlamada.

Al soǵan deıin operatorǵa habarlasqan azamattardyń test tapsyrý jónindegi ótinishi kúshinde qalady. Sondyqtan qaıta qońyraý shalyp, ótinim berý mindetti emes.

Sondaı-aq koronavırýsqa qarsy antıdene boıynsha test tapsyrý burynǵy rejımde jalǵasady.