Elorda men 5 oblysta jol salý talaptary buzylǵan

NUR-SULTAN. QazAqparat – Ótken jyly elimizdiń 5 oblysy men elorda kóshelerinde asfaltbeton jamylǵysynyń qalyńdyǵy jáne tyǵyzdyǵyna baılanysty óreskel buzýshylyqtar anyqtaldy. Bul týraly Qazaqstan Respýblıkasy Sybaılas jemqorlyqqa qarsy is-qımyl agenttiginiń alańynda ótken brıfıngte aıtyldy, dep habarlaıdy QazAqparat.

«2019 jyldyń qorytyndysy boıynsha jalpyǵa ortaq joldarǵa 8 myńnan astam tekserý, 12 myńnan astam qurylys materıaldaryna zerthanalyq tekserýler júrgizilip, 5 myńnan astam aqaý anyqtalyp otyr», - dedi «Jol aktıvteri sapasynyń ulttyq ortalyǵy» ShJQ RMK bas dırektorynyń orynbasary Darhan Saqanov.

Taldaý qorytyndysy boıynsha, 2019 jyly Aqmola, Qostanaı, Shyǵys jáne Batys Qazaqstan, Pavlodar oblystarynyń joldarynda jáne Nur-Sultan qalasynyń kóshelerinde asfaltbeton jamylǵysy qalyńdyqtary men tyǵyzdyqtarynyń sáıkes kelmeýi, sýǵa qanyǵý mólsheriniń ruqsat etilgen deńgeıden asyp ketýi sııaqty óreskel buzýshylyqtary anyqtalǵan.

Sapa ortalyǵynyń qyzmeti nátıjesinde 700 mln teńgeden astam somaǵa qurylys jumystary qaıta jasaldy.

«Jergilikti jelidegi joldardaǵy anyqtalǵan buzýshylyqtar týraly aqparat Memlekettik sáýlet – qurylys basqarmasyna jiberilip, nátıjesinde merdiger, jobalaýshy jáne tehnıkalyq qadaǵalaý qyzmeti jalpy somasy 1,5 mıllıon teńge ákimshilik jaýapkershilikke tartyldy», - deıdi Darhan Saqanov.