Elorda mektepteri úshin 26 myń kompıýter satyp alynady

NUR-SULTAN. QazAqparat – Nur-Sultan qalasy Bilim berý basqarmasynyń basshysy Sholpan Qadyrova oqýshylardy kompıýterlik tehnıkamen qamtý jumystaryn baıandady, dep habarlaıdy QazAqparat tilshisi.

«Barlyq bilim berý uıymdary qashyqtan oqytý jáne kezekshi synyp rejıminde jumystaryn jalǵastyrýda. Úzdiksiz bilim berý úderisin qamtamasyz etý maqsatynda mektep qorynan 9700 kompıýterlik tehnıka bólindi. Jergilikti bıýdjetten qosymsha 8 myń kompıýterlik tehnıka satyp alyndy», - dedi Sholpan Qadyrova elorda ákimdiginde ótken onlaın brıfıngte.

Buǵan qosa respýblıkalyq bıýdjetten 4 mlrd 87 mln teńge somasyna 26 472 kompıýterlik tehnıka satyp alynýda.

«Qazirgi ýaqytta onyń 6 772-si jetkizildi. Qalǵan 19 700 danasy qazan aıynyń sońynda jetkiziledi. Eń bastysy – az qamtylǵan, kópbalaly otbasynan shyqqan balalar, jetim jáne múgedek balalar kompıýtermen qamtamasyz etildi. Osy rette ata-analarǵa aıtarym, eger de mektepten berilgen kompıýterlerde aqaý tabylsa, mektep ákimshiligine habarlasyp, jóndep alýǵa bolady», - dedi basqarma basshysy.

Aıta keteıik, oqý jylynyń basynan beri elordada 18 bala COVID-19 vırýsyn juqtyrdy. Onyń 14-i qashyqtan oqyǵan, tórteýi – kezekshi synyp oqýshylary.