Elorda mektepteri 100% beınebaqylaý kameralary jáne týrnıketpen qamtylǵan

ASTANA. QazAqparat – Astanada bilim berý uıymdary tolyqtaı qaýipsizdik qural-jabdyqpen qamtyldy. Bul týraly qalalyq bilim basqarmasynyń basshysy Qasymhan Senǵazıev málim etti, dep habarlaıdy QazAqparat tilshisi.

«Bilim berý uıymdarynda balalardyń qaýipsizdigin qamtý boıynsha birqatar jumys atqaryldy. Búginde qalanyń barlyq oqý oryndary avtomatty órt dabylyna qosyldy. Sonymen qatar tsıfrlyq beınebaqylaý júıesimen qamtamasyz etildi. Beınebaqylaý kameralary men dabyl júıeleri jedel basqarý ortalyǵyna tikeleı qosylǵan. Bilim berý oryndaryn beınebaqylaý jáne qaýipsizdik quraldarymen qamtý qala boıynsha 100%», - dedi Qasymhan Senǵazıev Astana qalasy kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, balalardyń qaýipsizdigin birinshi sanattaǵy lıtsenzııasy bar kúzet mekemeleri qamtamasyz etedi.

«Sonymen qatar elordanyń bilim berý uıymdary tolyǵymen týrnıketpen jabdyqtalǵan», - deıdi ol.

Aıta ketsek, bıyl elordada 26 650 bala alǵash mektep tabaldyryǵyn attaıdy. 1 qyrkúıekte jalpy sany 255 000 bala sabaqqa barady.