Elorda mektebinde Qaýipsizdikti qoǵammen seriktestikte qamtamasyz etý tujyrymdamasynyń jobasy talqylandy
Kezdesý barysynda Qoǵamdyq qaýipsizdikti qoǵammen seriktestikte qamtamasyz etýdiń 2024-2028 jyldarǵa arnalǵan tujyrymdamasynyń jobasy talqylandy. Tujyrymdamanyń basty ereksheligi – ony ázirleý tásilderiniń ózgerýi. Buǵan deıin profılaktıka boıynsha barlyq baǵdarlamalyq qujattar tek ІІM qabyrǵasynda daıyndalǵan bolatyn. Bul – jol kartalary, keshendi josparlar jáne vedomstvolyq baǵdarlamalar. Endi tujyrymdamany ázirleýge birinshi kezeńnen bastap jurtshylyq, úkimettik emes uıymdar, táýelsiz sarapshylar, halyqaralyq uıymdar, ǵylymı qoǵamdastyq, sondaı-aq múddeli memlekettik organdar belsendi túrde tartylatyn bolady. Qujat ishki ister organdarynyń barlyq salalardy tolyq qamtı otyryp, qaýipsiz jáne quqyqtyq qoǵam qurý úshin azamattarmen ózara is-qımyldyń «servıstik» modeline kezeń-kezeńimen kóshýin kózdeıdi.
Sharada qylmyskerlerdiń 80% jumyssyz, 33% buryn sottalǵan ekendigi, jeke tulǵaǵa qarsy qylmystardyń 50% alkogolge jáne esirtkige mas kúıde jasalǵany, árbir ekinshi kámeletke tolmaǵan quqyq buzýshynyń oqymaǵandyǵy jáne jumys istemegendigi, sondaı-aq megapolısterdegi qylmystardyń 51% ózge óńirlerden kelgender jasaıtyny atap ótildi.
«Tek polıtsııanyń kómegimen qylmystyq quqyq buzýshylyq jasaý problemalaryn sheshý múmkin emes. Óıtkeni buǵan áleýmettik, ekonomıkalyq, geografııalyq, kóshi-qon, tabıǵı, mádenı, demografııalyq jáne basqa da faktorlar áser etedi. Qylmys deńgeıine 250-den astam faktor áser etetini ǵylymı negizde dáleldengen. Tujyrymdamada kórsetilgen sharalar Qazaqstannyń turaqty damýy úshin quqyqtyq tártipti qamtamasyz etýdiń sapaly ári jańa deńgeıine ótýge múmkindik beredi», – dedi Sanjar Ádilov.
Kezdesý shamamen eki saǵatqa sozyldy. Jıyn sońy qyzý talqylaýǵa ulasty. Mektep oqýshylary men muǵalimder quqyqtyq tártipti saqtaý jáne esirtki qylmystaryna qarsy is-qımyl boıynsha birqatar usynystar aıtty.