Elorda máslıhatyna kandıdattardy partııalyq tirkeý qorytyndysy jarııalandy
«Máslıhatqa saılaý alǵash ret saıası partııalardyń partııalyq tizimderi boıynsha ótip jatyr. Máslıhattar depýtattaryn saılaýdy uıymdastyrý men ótkizýdi aýmaqtyq saılaý komıssııalary qamtamasyz etedi. Qazaqstan Respýblıkasy máslıhattary depýtattarynyń kezekti saılaýyn daıyndaý jáne ótkizý jónindegi negizgi is-sharalardyń úlgilik kúntizbelik josparyna sáıkes, partııalyq tizimderdi usyný 2020 jylǵy 10 qarashadan 4 jeltoqsan aralyǵynda júrgizildi. Ortalyq saılaý komıssııasy 2021 jylǵy 10 qańtarǵa taǵaıyndalǵan Qazaqstan Respýblıkasy máslıhattary depýtattarynyń kezekti saılaýyna qatysýǵa Ádilet mınıstrliginde belgilengen tártippen tirkelgen 6 saıası partııa jiberilgen bolatyn», - dep toqtaldy Baqyt Bektemisova onlaın brıfıngide.
Nur-Sultan qalasynyń Qalalyq saılaý komıssııasyna 5 saıası partııadan: «Aýyl» Halyqtyq-demokratııalyq patrıottyq partııasy» qoǵamdyq birlestiginiń Nur-Sultan qalasy boıynsha óńirlik fılıalynan, «ADAL» Saıası partııasy» qoǵamdyq birlestiginiń Nur-Sultan qalasyndaǵy fılıalynan, «Nur Otan» partııasy» qoǵamdyq birlestiginiń Nur-Sultan qalalyq fılıalynan, «Aq jol» demokratııalyq partııasy qoǵamdyq birlestiginiń Astana qalalyq fılıalynan, «Qazaqstan Halyq partııasy» qoǵamdyq birlestiginiń Astana qalalyq fılıalynan Nur-Sultan qalasy máslıhaty depýtattyǵyna kandıdattardyń partııalyq tizimderin usyný týraly qujattar kelip tústi.
«Saıası partııalardyń fılıaldary qujattardy «Qazaqstan Respýblıkasyndaǵy saılaý týraly» Konstıtýtsııalyq Zań talaptaryna sáıkes usyndy. Partııalyq tizimderdi tirkeý 2020 jylǵy 10 jeltoqsanda jergilikti ýaqytpen saǵat 18:00-de aıaqtaldy. Partııalyq tizimderge 88 kandıdat engizildi, onyń ishinde: «Nur Otan» – 62, «Aýyl» – 5, «Aq jol» – 9, «ADAL» – 9, «Qazaqstan Halyq partııasy» 6 kandıdat usyndy», - dep naqtylady qalalyq saılaý komıssııasynyń tóraǵasy.
Saılaý týraly Konstıtýtsııalyq zańy 89-baby 4-tarmaǵynyń talaptaryna sáıkes partııalyq tizimde áıelder men jıyrma toǵyz jasqa tolmaǵan adamdardyń sany oǵan engizilgen adamdardyń jalpy sanynyń keminde otyz paıyzyn quraýǵa tıis. Qalalyq saılaý komıssııasyna usynylǵan partııalyq tizimderde áıelder men 29 jasqa tolmaǵan adamdardyń sany - 36, ıaǵnı 40,9 paıyzdy qurady.
«Partııalyq tizimderge engizilgen tulǵalardyń zańnama talaptaryna sáıkestigi anyqtaldy. Kandıdattan kelip túsken ótinishi boıynsha «Nur Otan» partııasynyń partııalyq tiziminen 1 kandıdatty alyp tastaý týraly sheshim qabyldandy. Osylaısha, partııalyq tizimderge engizilgen kandıdattardyń sany 87 adamdy qurady, onyń ishinde áıelder men 29 jasqa tolmaǵan adamdardyń sany - 35. Saılaý týraly Konstıtýtsııalyq zańnyń talaptaryna sáıkes, barlyq saıası partııalar saılaý jarnasyn engizdi. 5 saıası partııa fılıaldarynyń partııalyq tizimderin qalalyq saılaý komıssııasy tirkedi jáne olar buqaralyq aqparat quraldarynda jarııalandy», - dedi Baqyt Bektemisova.