Elorda mańyndaǵy eldi mekenderge gaz tartýǵa qarajat qarastyrylǵan

NUR-SULTAN. QazAqparat – Elordaǵa deıin «Saryarqa» magıstraldyq gaz qubyryn salý jobasynyń 1-kezeńi aıasynda Aqmola oblysynyń Arshaly jáne Tselınograd aýdandaryn gazdandyrý múmkindigi bar. Bul týraly Aqmola oblysynyń turǵyndarymen kezdesken QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Jalpy, búgingi tańda Aqmola oblysyn gazdandyrý 2 kezekke bólingen. 20 eldi mekendi gazdandyrý úshin 13 jobadan turatyn gazdandyrýdyń birinshi kezegine oblys ákimdigi jobalaý-smeta qujattamasyn ázirledi. 2020-2021 jyldar kezeńinde oblys ákimdigine 8 jobany iske asyrýǵa respýblıkalyq bıýdjetten 6,4 mlrd teńge bólindi. Atalǵan jobalar boıynsha 2021 jyly 14 eldi mekendi gazdandyrýdy kózdeıtin qurylys-montajdaý jumystary tolyq aıaqtaldy, bul 9 myńnan astam adamdy gazben qamtamasyz etýge múmkindik beredi»,- dedi A. Aqsholaqov.

Onyń aıtýynsha, tabıǵı gazdy qalǵan eldi mekenderge berý gazben jabdyqtaý obektilerin senimgerlik basqarýǵa tapsyrǵannan keıin qamtamasyz etiledi.

2022-2023 jyldarǵa ákimdikke respýblıkalyq bıýdjetten 9,3 mlrd teńge somasynda qarajat kózdelgen. Osy qarajatqa qosymsha 6 eldi mekendi – Aqqaıyń, Shubar jáne Qoıandy (Tselınograd aýdany) jáne Arshaly, Jibek Joly men Jaltyrkóldi (Arshaly aýdany) gazdandyrýdy aıaqtaý josparlanyp otyr. Bul jobalar shamamen 26 myń adamdy gazben qamtamasyz etedi.

Sonymen qatar Energetıka mınıstri qazirgi ýaqytta ákimdik Tselınograd aýdanynyń 9 eldi mekenin gazdandyrý boıynsha jobalaý-smeta qujattamasyn ázirlep jatqanyn atap ótti.

Foto: vesti.ua