Elorda kúnine sheteldik ártister shaqyryla ma

ASTANA. QazAqparat – Bıyl Astanaǵa 25 jyl. Qala mereıtoıyna arnalǵan sharalarda sheteldik ártisterdiń óner kórsetýi múmkin be? Bul saýalǵa Astana qalasy ishki saıasat basqarmasynyń basshysy Dáýren Babamuratov jaýap berdi, dep habarlaıdy QazAqparat tilshisi.

«Astana kúnin toılaýǵa baılanysty sheteldik ártister shaqyrylmaıdy. Sondaı-aq, bul kúnderi shetel ártisteriniń jeke kontsertteri de josparlanbaǵan. Qala kúnine oraı ótetin barlyq mádenı is-shara tek otandyq ártisterdiń qatysýymen ótedi», - dedi Dáýren Babamuratov qalalyq ortalyq kommýnıkatsııalar qyzmeti alańynda ótken baspasóz máslıhatynda.

Odan bólek, basqarma basshysy bıyl elorda kúnine oraı saıahattap keletin otandyq jáne sheteldik týrısterge qatysty pikir bildirdi.

«Qala kúni qarsańynda elordaǵa keletin naqty týrısterdiń sany belgisiz. Sebebi, ol boıynsha naqty sanaý júrgizilgen joq. Biraq, ádettegiden kóp bolady dep boljanyp otyr. Óıtkeni, pandemııadan keıin elorda kúnin aýqymdy túrde atap ótkeli otyrmyz. Pandemııaǵa deıingi jyldarǵa qaraǵanda týrısterdiń kelýi artady degen oı bar», - deıdi ol.

Aıta keteıik, bıyl Astana kúni bir aıy boıy toılanbaq, mereke aıasynda 100-den astam mádenı, sporttyq jáne tanymdyq is-shara ótedi dep josparlanýda.

Olardyń qatarynda 2 shildede ótetin «Qazaqstan barysy» týrnıri bar.

Odan bólek, alyptar saıysy josparlanyp otyr, júlde qory – 2 mln teńge.