Elorda kúnine oraı Oralda 9 qabatty turǵyn úı paıdalanýǵa berildi
Rýjeınıkov kóshesi 12-mekenjaıda apatty úıdiń ornyna memlekettik-jekeshelik áriptestik aıasynda turǵyzylǵan jańa mekenge 36 oraldyq otbasy kóshti.
Jańa baspana ıelerine páter kiltterin oblys ákimi Ǵalı Esqalıev tabys etti.
«Barlyq óńir turǵyndaryn Elorda kúnimen quttyqtaımyn. Tuńǵysh Prezıdentimiz – Elbasy Nursultan Ábishuly Nazarbaevtyń arqasynda qazaqtyń keń baıtaq dalasynda teńdesi joq qala salynǵanyn barsha álem biledi. Qazirgi kezde astanamyzda 1 mln astam adam turyp jatyr. Nur-Sultan qalasyna qarap óńirler damýda. Bizde de turǵyn úıler, jańa mektep, balabaqsha, aýrýhanalar boı kóterýde. Memlekettik-jekemenshik áriptestik aıasynda salynǵan jańa úıdiń ınfraqurylymyn tartýǵa memleket tarapynan 100 mln astam teńge bólindi. Qurylysty salǵan «Bolashaq-T» JShS ujymyna alǵysymyzdy bildiremiz», dedi óńir basshysy.
Jańa úıden páter alǵandardyń biri, 11 balanyń anasy, «Altyn alqa» ıegeri Mástýra Ataýlına bul qýanyshty kópten kútkenin aıtyp, baspanaly bolǵandardyń bárin Elorda kúnimen quttyqtady.
Qala ákiminiń orynbasary Mıras Múlkáıdiń sózine qaraǵanda, Oralda 52 úı apatty jaǵdaıda dep tanylǵan. Tozyǵy jetken 200-deı úı taǵy bar.
2015 jyldan beri shaharda 19 apatty úı súrilip, ornyna qazirgi zamanǵy kópqabatty 8 ǵımarat boı kóterdi.
Onyń ishinen 1500-den astam adamy bar otbasylar jańa páterge qol jetkizdi. Atalmysh baǵdarlama boıynsha jumystar aldaǵy ýaqytta da jalǵasady.