Elorda irgesindegi aýyldarda sý tasqyny qaýpi seıildi - ákim

KÓKShETAÝ. QazAqparat - Aqmola oblysynyń Tselınograd jáne Arshaly aýdandarynda sý tasqyny qaýpi birshama tómendedi. Bul týraly jyl saıyn kóktemgi sý tasqynynan zardap shegetin astananyń irgesindegi aýdandarda júrgizilip jatqan aldyn alý sharalarmen tanysqan aımaq basshysy Ermek Marjyqpaev málim etti, dep habarlaıdy QazAqparat tilshisi.

Qazirgi kezde Tselınograd aýdanynda jaǵdaı turaqtanyp keledi.

Esil ózeniniń boıyndaǵy sý basýy yqtımal aımaqta ornalasqan Qoıandy, Sofıevka, Qaraótkel, Talapker aýyldyq okrýgterinde táýlik boıy erigen qar sýyn sorý, ınertti materıal salynǵan qap tóseý, kanaldardy jaılastyrý jáne tazalaý jumysy júrgizildi.

Nura ózeniniń boıynda 8 jerden muz jarylyp, sýdyń kedergisiz aǵýyna jaǵdaı jasaldy.

Aımaq basshysy Qosshy qalasy men Tselınograd aýdanyndaǵy eldi mekenderde káriz júıesin salý boıynsha usynys jasaýdy, sondaı-aq, jobalardyń smetalyq qunyn esepteýdi tapsyrdy.

«Mindetti túrde sýaǵar salý, ony Qoıandy jáne Qaraótkel aýyldarynan kezeń-kezeńmen bastaý kerek. Sý basýdyń negizgi qaýpi tómendedi. Bul rette eldi mekenderden qardy ýaqytyly shyǵarýdyń paıdasy tıdi», - dep atap ótti aımaq basshysy.

Sonymen birge, Ermek Marjyqpaev Jibek joly kentindegi sý ótkizý arnalarynyń tazalyǵyna da nazar aýdardy.

Aıta keteıik, kóktemgi sý tasqynynyń aldyn alý sharalary aıasynda 14 aýdannyń 53 eldi mekeninde 47 sý ótkizý nysandary jóndeldi.

Jalpy uzyndyǵy 35 shaqyrym sý burý arnalary keńeıtilip, tereńdetildi, ózen arnalary tazartyldy, topyraq úıindisinen turǵyzylǵan bógetter nyǵaıtyldy.