Elorda halqyna jylyna 60 myń adam qosylady - Bas josparǵa túzetýler engiziledi

NUR-SULTAN. QazAqparat – Elordany damytýdyń Bas josparyna túzetýler pysyqtalyp jatyr. Bul týraly elorda máslıhatynyń kezekten tys sessııasynda qala ákimi Altaı Kólginov aıtty, dep habarlaıdy QazAqparat tilshisi.

«Qala turǵyndarynyń sany jyl saıyn artyp keledi, ıaǵnı jylda 55-60 myń qosylady. Eger 2010 jyly 650 myńǵa jýyq turǵyn bolsa, byltyrǵy jáne bıylǵy kórsetkishter boıynsha 1 mln 200 myń adam. 2010 jyly Bas jospardy qabyldaǵan kezde 2030 jyly jetemiz degen jospar bolǵan. Al ony biz 10 jyl buryn jetip qoıdyq», - dedi Altaı Kólginov.

Onyń aıtýynsha, aldaǵy ýaqytta turǵyndar sanynyń 2 mln-ǵa jetýi múmkin ekenin eskere otyryp, salynatyn turǵyn úıler, ınjenerlik jeliler, mektepter jáne basqa da máseleler boıynsha tıisti sheshimder qabyldaý kerek.

«Biz qazir Bas josparǵa túzetýlerdi eskerip otyrmyz. 2030 jyly turǵyndar sany 2 mln-ǵa jetip qalady degen esepteýler bar», - dedi qala ákimi.