Elorda emhanalaryna 1,1 mln adam tirkelgen

NUR-SULTAN. QazAqparat - Nur-Sultan ákiminiń orynbasary Baqtııar Mákenniń tóraǵalyq etýimen Qoǵamdyq densaýlyq saqtaý basqarmasynyń ótken jyldyń qorytyndysyna arnalǵan alqa otyrysy ótti, dep habarlaıdy QazAqparat qala ákimdiginiń resmı saıtyna silteme jasap.

Qoǵamdyq densaýlyq saqtaý basqarmasynyń basshysy Sáýle Qısyqova elordadaǵy densaýlyq saqtaý salasynyń ótken jyldaǵy kórsetkishterine oń baǵa berdi.

«2018 jylmen salystyrǵanda aýrýshańdyq 9,3%, jalpy ólim-jitim 2,5% tómendedi. Ana men bala óliminiń aıtarlyqtaı tómendeýi baıqalady, bala týý kórsetkishi artty... Sondaı-aq sozylmaly aýrýlar kezinde emdeý men dári-dármekpen qamtamasyz etý atalmysh kórsetkishterdiń azaıýyna sebep boldy. Nátıjesinde, týberkýlezben syrqattaný 8,3%, týberkýlezden ólim-jitim 54% azaıdy. Balalar arasynda týberkýlezben aýrý 19% tómendedi», - dedi Sáýle Qısyqova.

Búgingi tańda Nur-Sultan qalasynda bastapqy sanıtarlyq-medıtsınalyq kómekti kórsetetin 31 uıym jumys atqarady. 2019 jyly «Qoljetimdi dáriger» atty 12 joba iske asyryldy, «Kópbeıindi medıtsınalyq ortalyǵynda» Insýlt ortalyǵy ashyldy. 2018 jylmen salystyrǵanda ınsýlt ortalyqtarynda emdelgen adamdardyń kórsetkishi kóbeıgen.

Qazaqstanda aǵymdaǵy jyldyń 1 qańtarynan bastap Mindetti áleýmettik medıtsınalyq saqtandyrý júıesin engizý alqa otyrysynda talqylanǵan mańyzdy taqyryptardyń biri boldy. Qoǵamdyq densaýlyq saqtaý basqarmasynyń basshysy MÁMS shetelderde keńinen qoldanylatyn ozyq tájirıbe ekendigin atap ótti.

Statıstıkalyq málimetterge sáıkes, 1 qańtarda 1 162 878 astanalyq emhanalarǵa tirkelgen. 2020 jyly MÁMS aıasynda 8,1 mlrd teńge qarastyrylǵan.

Otyrysta sondaı-aq elimizdiń densaýlyq saqtaý salasyn keshendi damytýǵa baǵyttalǵan «Densaýlyq 2020-2025» baǵdarlamasy talqylandy. Qazaqstandyqtardyń densaýlyǵyn nyǵaıtý maqsatynda medıtsınalyq mekemeler qyzmetiniń nátıjelerin jaqsartý qajettiligimen qatar, atalǵan baǵdarlamada medıtsına qyzmetkeriniń mártebesin arttyrýǵa jáne mamandar úshin halyqaralyq talaptar men standarttarǵa sáıkes jaǵdaılar jasaýǵa úlken kóńil bólinedi.

Materıaldyq-tehnıkalyq bazany únemi jańartýmen qatar, medıtsına uıymdarynyń basshylary kadr tapshylyǵy máselesin kóterdi. Ótken jyly dárigerler tapshylyǵy 494 birlikti qurady, onyń ishinde mamandyqtar boıynsha: jalpy praktıka dárigerleri – 107, pedıatrlar – 36, terapevter – 52, akýsher-gınekologtar – 42, anestezıolog-reanımatologtar – 41, kardıologtar – 16, psıhıatrlar – 3, onkologtar – 16, neonatologtar – 28 jáne basqalar.

Osy máseleni sheshý maqsatynda 2019 jyly elordalyq Densaýlyq saqtaý uıymdaryna 217 jas maman jumysqa ornalastyryldy. Medıtsınalyq kadrlardyń tapshylyǵy 44% tómendedi, onyń ishinde jalpy praktıka dárigerleri – 41%, pedıatrlar – 36,1%, terapevter – 42,3%, akýsher – gınekologtar – 69%, anestezıolog-reanımatologtar – 22%, kardıologtar – 56,3%, neonatologtar – 3,6% tómendedi.

Bahtııar Máken otyrysqa qatysýshylardy kadr tapshylyǵy máselesin qarastyryp, medıtsınalyq uıymdar basshylary osy túıitkildi sheshýge atsalysý qajettigin eskertti.

«Medıtsınalyq uıymdardyń basshylyǵy bul máselege beı-jaı qaramaý qajet. Biz birlesip medıtsınalyq mekemelerge jas mamandardy tartýdyń júıeli mehanızmderi men ádisterin qurýymyz tıis», - dedi ol.

Sóz sońynda ákim orynbasary barlyq medıtsına qyzmetkerlerine halyqpen keri baılanys jasap, sapaly qyzmet kórsetýdi tapsyrdy.