Elorda dárigerleri týǵannan deformatsııadan zardap shekken jas qyzdy aıaǵynan turǵyzdy

ASTANA. QazAqparat - Elordada akademık N.J.Batpenov atyndaǵy UǴTOO dárigerleri, bala kezinen aýyrǵan, týa bitti osteogenezi jetilmegen, eki aıaǵynyń kóp jazyq deformatsııasy bar 25 jastaǵy qyz balany aıaǵyna turǵyzdy. Bul týraly QazAqparat «Áleýmettik medıtsınalyq saqtandyrý qoryna» silteme jasap habaraıdy.

Ortalyq dárigerleri kóptegen klınıkalyq taldaýlar júrgize kele, oń jambasynyń osteotomııasyn túzetip, blokatorlyq plastınkamen sıntez jasaýǵa, eki jilinshiginiń súıekteriniń osteotomııasyn túzetýge, qursaýlaıtyn ózekshemen osteosıntezdeýge sheshim qabyldady. Uzaq ońaltýdan keıin ol óz aıaǵyna turdy. Emdeý MÁMS júıesi aıasynda júrgizildi

Qyzylordalyq 25 jastaǵy naýqas A.-nyń eki aıaǵynyń aýyrý tarıhy bala kezinen bastalǵan. «Men óz aıaǵymmen júrgim keledi, maǵan kómektesińizdershi» - ol 2014 jyly alǵash ret elordadaǵy travmatologııa jáne ortopedııa ortalyǵyna osyndaı ótinishpen kelgen. Patologııalyq syrqat saldarynan aıaqtary birneshe ret synǵan. Konservatıvti em júrgizilgen.

№2 ortopedııa bólimshesindegi emdeýshi dárigeri Áset Asqaruly Nurahmetovtiń aıtýynsha, tekserý kezinde naýqas múgedekter arbasynyń kómegimen qozǵalatyn. Fotosýrette eki jilinshiktiń jáne oń jambastyń pishini óreskel ózgergeni – kóp jazyqty deformatsııasy, eki aıaqtyń bulshyq etteriniń gıpotrofııasy baıqalady.

Foto: MÁMS

«Naýqas bala kezinen bastap týa bitti osteogenez kemistigimen, eki aıaqtyń kóp jazyqty deformatsııasymen aýyrǵan. Patologııalyq syrqat saldarynan aıaqtary birneshe ret synǵan. Ortalyq dárigerleri kóptegen klınıkalyq taldaýlar júrgize kele, oń jambasynyń osteotomııasyn túzetip, blokatorlyq plastınkamen sıntez jasaýǵa, eki jilinshiginiń súıekteriniń osteotomııasyn túzetýge, qursaýlaıtyn ózekshemen osteosıntezdeýge sheshim qabyldady. Uzaq ońaltýdan keıin ol óz aıaǵyna turdy», - dep túsindirdi dáriger.

Akademık N.J.Batpenov atyndaǵy UǴTOO-nyń basty artyqshylyǵy – dáriger-mamandarynyń joǵary biliktiliginde.

«Bilikti dáregerlerdiń jáne MÁMS arqasynda, jyldar boıy ońaltýdan ótip turǵannan keıin, men qazir óz aıaǵymmen júremin. Meni aıaǵyma turǵyzǵandary úshin ómir boıy alǵys aıtamyn. Qazir belsendi ómir saltyn ustanamyn, bı bılep, tipti sahnada án aıtamyn», - dep qýanyshymen bólisedi 25 jastaǵy qyz bala A.

Keıin ol turǵylyqty jeri boıynsha emhanadaǵy travmatolog dárigerdiń baqylaýyna aýysqan.