Elorda bıýdjetinde áleýmettik salany qarjylandyrý erekshe tártippen qaraldy
«Nur-Sultan qalasynyń 2022-2024 jyldarǵa arnalǵan bıýdjetine engiziletin ózgeristerde tıisti taldaý negizge alynyp, menshikti kirister boıynsha jospardy 68 mlrd teńgege, ıaǵnı 553 mlrd teńgege deıin ulǵaıtý usynylyp otyr. Onyń ishinde salyq túsimderi 54 mlrd teńgege, salyq túsimderine jatpaıtyn kirister 5,1 mlrd teńgege, sondaı-aq negizgi kapıtaldy satýdan keletin túsimder boıynsha 9,6 mlrd teńgege deıin ulǵaıtý eskerilgen», - dedi elordanyń Ekonomıka jáne bıýdjettik josparlaý basqarmasynyń basshysy Qaısar Mańqaraev
Onyń aıtýynsha, memlekettiń áleýmettik mindettemelerin oryndaý basymdyǵy aıasynda áleýmettik salany qarjylandyrý máselesi erekshe tártippen qaraldy.
«Áleýmettik salaǵa 21,4 mlrd teńge baǵyttaldy. Bul bıýdjettik sala kásiporyndary men uıymdary qyzmetkerleriniń jalaqysyn kóterýge, qarttardy qoldaýǵa, «Invataksı» tasymaldaý qyzmetin kórsetýge bólindi. Budan basqa, granttar berý arqyly halyqtyń áleýmettik osal toptary arasynda kásipkerlikti damytýdy yntalandyrý, áleýmettik mańyzy bar taýarlar boıynsha baǵany turaqtandyrý úshin qarajat josparlandy», - dedi basqarma basshysy.
Densaýlyq saqtaý salasynda angıograf, dárilik zattar satyp alý, medıtsına nysandaryn kúrdelý jóndeýden ótkizý eskerilgen.
Sonymen qatar, bilim salasynda pedagogterdiń jalaqy qoryna, oqýlyq satyp alýǵa, joǵary oqý oryndarynda 1 200 orynǵa pedagogıka jáne medıtsına mamandyqtaryna memlekettik tapsyrysqa qarajat qarastyryldy.
«Qarajattyń edáýir bóligi ınfraqurylymdy nyǵaıtýǵa, jol-kólik jelisin kútip ustaýǵa ári damytýǵa baǵyttalatyn bolady. Qala kósheleriniń qurylysyn aıaqtaýǵa jáne jolaýshylar tasymalyn sýbsıdııalaýǵa qarajat baǵyttalady», - dedi Qaısar Mańqaraev.
«Engizilgen ózgeristerdi eskere otyryp, Nur-Sultan qalasynyń 2022 jylǵa naqtylanǵan bıýdjetiniń jalpy kólemi 885 mlrd 234 mln teńgeni quraıdy. Onyń ishinde menshikti kirister boıynsha túsimder 552 mlrd 862 mln teńge, respýblıkalyq bıýdjetten transfertter túsimi 236 mlrd 927 mln teńgeni qamtıdy», - dedi basqarma basshysy.