Elorda aınalasyndaǵy jasyl beldeý 100 myń gektarǵa jetkiziledi

NUR-SULTAN. QazAqparat – Elordany qorshap jatqan ormandy alqap 2025 jylǵa deıin 100 myń gektarǵa deıin jektiziledi, dep habarlaıdy QazAqparat tilshisi.

«Memleket basshysy halyqqa Joldaýynda bıoártúrlilik pen ekologııa máselelerine erekshe nazar aýdarǵany belgili. 2025 jylǵa deıin orman alqaptarynda 2 mlrd túp, eldi mekenderde 15 mln túp aǵash otyrǵyzylady. Qazirgi tańda Elbasynyń bastamasymen qolǵa alynǵan bizdiń elordany qorshap jatqan jasyl beldeýdiń aýqymy 88 myń gektardy quraıdy. 2025 jylǵa deıin bul kórsetkish 100 myń gektarǵa deıin jetkiziledi», - dedi Úkimet basshysynyń orynbasary Roman Sklıar Úkimet úıindegi baspasóz máslıhatynda.

Sondaı-aq onyń aıtýynsha, balyq sharýashylyǵy men ekologııalyq týrızmge erekshe nazar aýdarylady. Osyǵan baılanysty Ekologııa, geologııa jáne tabıǵı resýrstar mınıstrligi jan-janýarlardy qorǵaý, bıologııalyq túrlilikti tıimdi paıdalaný boıynsha kontseptýaldyq qujatty ázirleý jumysyn bastap ketken.

«Sonymen qatar qorshaǵan ortaǵa zııan keltirgen azamattardyń ákimshilik jáne qylmystyq jaýapkershiligi kúsheıtiledi», - dedi ol.