Elorda áýejaıynda jolaýshylarǵa baýyrsaq taratylyp, qymyz quıyldy

NUR-SULTAN. QazAqparat - Nur-Sultan Nazarbaev halyqaralyq áýejaıynda merekelik kóńil-kúı: munda, áýe aılaǵynyń qyzmetkerleri baýyrsaq taratyp, qymyz quıyp jatyr, ishki reıster termınalynda kıiz úı ornatylǵan, dep habarlaıdy QazAqparat áýejaıdyń baspasóz qyzmetine silteme jasap.

Áýe aılaǵynyń baspasóz hatshysy Ánýar Shalekenov áýejaıda merekelik kóńil-kúı bes kún boıy jalǵasatynyn aıtty.

«Osylaısha kóktemgi kún men túnniń teńeletin tamasha kúni keldi. Bul mereke ózimen qatar tabıǵattyń jańarýyn jáne uzaq sýyq aılardan keıingi jerdiń oıanýyn ala keledi. Sizderdi osy kóktem merekesimen quttyqtaımyn jáne ony ómirlerińizdegi jańa jańalyqtarmen, oılarmen jáne ózgeristermen qarsy alýlaryńyzǵa tilektespin! Janyńyzda árqashan qýanysh pen shýaq bolsyn! Naýryz meıramyn osyndaı formatta toılaý jaqsy dástúrge aınalǵan. Búginde jolaýshylarymyzǵa 150 keli baýyrsaq pen 60 lıtr qymyz berildi», - dedi ol.

Іshki reısterdiń jolaýshylary baýyrsaqtan dám tatyp, qymyz iship, bı bılep, ónerpazdarǵa qazaqsha án aıtyp, kıiz úıdiń fonynda sýretke tústi.

«Búgin nemeremmen Almatyǵa ushyp baramyn, áýejaı qyzmetkerleriniń mundaı tosyn syıy meni qýantty. Búgin bizde ulttyq mereke – Naýryz meıramy. Osynaý kóktem men jańarýdyń jarqyn merekesinde barshańyzǵa shyn júrekten meıirimdilik, jylýlyq, otbasylyq amandyq tileımin! Shańyraq shattyq pen baqytqa toly bolsyn! Meırammen quttyqtaımyn!», – dedi jolaýshylardyń biri Naǵıma Dáýletova.