Elorda áýejaıynda esirtkimen ustalǵan er adamǵa sot úkimi shyqty

NUR-SULTAN. QazAqparat – Ótken jyldyń jeltoqsan aıynda kólik polıtseıleri Nur-Sultan qalasyndaǵy «Nursultan Nazarbaev» halyqaralyq áýejaıynyń №1 termınalynda «Nur-Sultan-Sharm – El-Sheıh» baǵytyndaǵy reıspen ushyp bara jatqan 38 jastaǵy elorda turǵynyn anyqtap, ustady, dep habarlaıdy Kóliktegi polıtsııa departamentiniń baspasóz qyzmeti.

Áýejaı termınalynda ornalasqan shekara beketinde tekserý kezinde azamattyń qaltasynan qaǵazǵa oralǵan jasyl tústi ósimdik tektes zat tabylyp, tárkilendi.

Saraptama qorytyndysyna sáıkes, alynǵan zat jalpy salmaǵy 6,11 gramm bolatyn «keptirilgen marıhýana» esirtki zaty ekeni anyqtaldy.

Atalǵan fakti boıynsha QR QK-niń 286-baby 1-bóligimen, ıaǵnı, Qazaqstan Respýblıkasynyń Memlekettik shekarasy arqyly esirtki quralyn zańsyz ótkizý jáne QR QK 296-babynyń 2-bóligimen, ıaǵnı, esirtki zatyn ótkizý maqsatynsyz zańsyz saqtaý boıynsha sotqa deıingi tergeý amaldary júrgizildi.

Tergeý barysynda er adam óz kinásin moıyndady.

Nur-Sultan qalasynyń qylmystyq ister jónindegi mamandandyrylǵan aýdanaralyq sotynyń sheshimimen quqyqbuzýshy qylmystyq quqyq buzýshylyq jasaǵany úshin kináli dep tanylyp, oǵan 300 AEK kóleminde 1 mln 300 myń teńge kóleminde aıyppul salyndy.