Elorda áýejaıynda 40 reıs keshigip jatyr

ASTANA. QazAqparat - Nursultan Nazarbaev halyqaralyq áýejaıy aýa raıyna baılanysty birqatar reıs keshigip jatqanyn málim etti, dep habarlaıdy QazAqparat.

Qazirgi ýaqytta áýejaı shtattyq rejımde jumys istep tur, degenmen keıbir reıster keshigip jatyr.

Ushyp keletin 26 reıs, ushyp ketetin 14 reıs keshikken.

Oǵan elordadaǵy meteojaǵdaı men áýe kemeleriniń kesh kelýi sebep boldy.

Áýejaıdyń ushý-qoný jolaǵyn qardan tazartý jumystary úzdiksiz júrip jatyr.

«Jolaýshylardan abaı bolýdy, sondaı-aq ózekti aqparatty avıakompanııalar men áýejaıdyń anyqtamalyq baılanys ortalyqtarynan bilýlerin suraımyz» delingen habarlamada.

Eske sala keteıik, buǵan deıin elordada aýa raıynyń qolaısyzdyǵynan ushaqtar keshigip jatqanyn jazǵan edik.

«Qazir qonýy tıis 10 reıs, al ushyp ketýi tıis 18 reıs keshigip jatyr. Oǵan sebep - aýa raıynyń qolaısyzdyǵy», - deıdi elorda áýejaıynan.