Elorda ákimi Jeńis Qasymbek qala múlkine uqyppen qaraýǵa shaqyrdy
Ákim keıbir azamattardyń aqylǵa qonymsyz áreketinen jalpyqalalyq múlikke zııan kelip jatqanyn aıtty.
«Qalamyzdy jaqsartý úshin turǵyndarmen kún saıyn birlese jumys isteımiz. Abattandyryp, qolaıly ete túsemiz. Degenmen ókinishke qaraı, vandalızm men mádenıetke saı kelmeıtin áreketter bar. Keıbir azamattardyń aqylǵa qonymsyz áreketinen jalpyqalalyq múlikke zııan keledi: aıaldamalardy, oryndyqtardy, aýlalardy búldiredi, qoqys jáshikterin tóńkerip tastaıdy jáne t.b. Osylaısha qalanyń ózge de turǵyndary men qonaqtaryna sóz tıedi.
Vandalızm – bul jeke mádenıet pen tárbıeniń deńgeıi. Ári bul synnan kez kelgen adam óte bermeıdi. Qalada qandaı jumysty qolǵa alsaq ta, adamdarǵa yńǵaıly bolý úshin oryndaımyz. Jalpyǵa ortaq qala múlkin búldirý arqyly quqyq buzýshylar elordanyń ózge turǵyndary men qonaqtaryna qolaısyzdyq týdyrady. Dál osy kóshede olardyń jaqyndary men týystary júredi», - dedi qala ákimi.
Onyń aıtýynsha, osy jyldyń 8 aıynda ǵana elordada qoǵamdyq tártipti buzýǵa qatysty 10 myńnan astam jaǵdaı tirkelgen. Polıtsııa qoǵamdyq tártipti saqtaýǵa jáne quqyq buzýshylyqtyń aldyn alýǵa baǵyttalǵan júıeli jumys júrgizip jatyr. Tártip saqshylary kún saıyn qalany kúzetip, tártip buzýshylardy anyqtaıdy.
«Qalamyzda jyl saıyn kameralar sanyn kóbeıtetin bolamyz. Quqyq buzylǵany úshin qashanda jaza bar ekenin umytpaǵan jón. Kez kelgen quqyq buzýshylyqqa jáne qoǵamdyq aıyptaýǵa tózimdilik nóldik deńgeıde bolýy kerek.
Elorda turǵyndary men qonaqtaryn qalamyzǵa uqyppen qaraýǵa shaqyramyn! Bul qalada jaqyndarymyz, týystarymyz jáne ózimiz ómir súremiz!», - dep jazdy ákim Instagram jelisindegi paraqshasynda.