Elorda ákimi turǵyndardyń aqyly turaqtarǵa qatysty shaǵymyn qaraýǵa ýáde berdi
«Aqyly turaqtar – bul da iri qalalar úshin jańa joba. Halyqaralyq tájirıbede aqyly turaqtar tártipsiz qozǵalysty nemese tártipsiz turaqtardy retteý úshin qoldanylady. Joba Mınıstrlikter úıi ornalasqan Máńgilik el dańǵylynda jaqsy qyrynan kórindi. Kezinde avtokólik qoıatyn jer bolmaı, shaǵym kóp túsetin edi. Odan keıin, ásirese qys ýaqytynda kólikter qalanyń qaryn tazalaýǵa da kedergi keltiretin», - dedi Altaı Kólginov Ortalyq kommýnıkatsııalar qyzmetindegi baspasóz máslıhaty barysynda BAQ ókilderiniń saýalyna oraı.
Onyń atap ótýinshe, aqyly turaqtarǵa qatysty memlekettik-jekeshelik áriptestik kelisimshartyna 2019 jyly qol qoıylǵan.
«Biz ony qaıtadan qaradyq. Esterińizde bolsa, tipti áleýmettik turǵyn úılerdiń janyna aqyly turaqtar ornata bastaǵan soń turǵyndardan shaǵymnyń kóp túskenin eskere otyryp, sottasqan da edik. Oǵan túbegeıli qarsy (turǵyn úılerdiń janyna aqyly turaq ornatýǵa) boldyq jáne ony qaıta qaradyq. Bul jańa joba ekenin eskersek, ony jetildirý úshin áli de jumys isteýge daıynbyz. Eń bastysy, tártiptiń bolýy jáne turǵyndardyń múddesine qaıshy kelmeýi tıis. Biz barlyq shaǵymdy qaraýǵa daıynbyz. Eger aqyly turaqtar bir jerde zańsyz ornatylsa, onda ony alyp tastaımyz», - dedi elorda basshysy.