Elorda ákimi sý, jylý máseleleri qalaı sheshilip jatqanyn aıtty

ASTANA. QazAqparat - Astana qalasynyń ákimi sý, jylý máseleleri qalaı sheshilip jatqany týraly túsindirip berdi, dep habarlaıdy QazAqparat elorda ákimdiginiń resmı saıtyna silteme jasap.

«Astanada turǵyndar sany kún sanap kóbeıip keledi. Resmı túrde qalamyzda 1 mln 350 myń adam turady, 1,5 mln-ǵa aqyryndap jyljyp baramyz. Mine osyǵan baılanysty ózine tán problemalary bar. Eń ózekti máselelerdiń biri - kommýnaldyq mekemelerdiń jumysy, ıaǵnı jylý, sý máseleleri bar. Sońǵy aptalar ishinde qala turǵyndary tarapynan sý máselesi erekshe kóterilip keledi», - dedi Jeńis Qasymbek.

Qala basshysy sózin jalǵaı otyryp, atalǵan máselelerge toqtalyp ótti.

«Byltyr Astanada 3 mln sharshy metr turǵyn úı qoldanysqa berildi. Tıisinshe bul jylýmen qamtý máselesiniń sheshilýin talap etedi. Osy maqsatta tıisti jumys júrip jatyr. Bıyl eki gaz jylý stantsııasy iske qosylady. Ol eki stantsııa 600 gıgakalorııa jylý beredi. Bul jumysty tamyz aıynda aıaqtaýdy josparlap otyrmyz. JEO-3-tiń birinshi kezeńi bıyl aıaqtalady. Ol - bes qazandyq. Bul qosymsha 400 gıgakalorııa jylý beredi. Osylaısha 1000 gıgakalorııa bolady. Bul aldaǵy úsh-tórt jylǵa jetkilikti bolady», - dep túsindirdi Jeńis Qasymbek.

Ákim óz sózinde sońǵy ýaqyttary jurtshylyq tarapynan jıi qozǵalǵan sý máselesine erekshe toqtalyp ótti.

«Ekinshi másele - sý máselesi. Bıyl sorǵy-cúzgi stantsııasyn qurlysyn aıaqtaımyz. Bul qosymsha táýligine 100 myń kýb.metr sý beretin bolady. Qazir 25 myń kýb.metr kóleminde jetispeýshilik bar. Ol jetispeýshiliktiń ornyn toltyryp, qosymsha 75 myń kýb.metr sý bermek. Tıisinshe, aldaǵy ýaqytta eshqandaı shekteýler bolmaıdy. Sý tolyq qysymmen beriletin bolady. Biraq qosymsha osyndaı úlken nysandardyń qurylysyn bastaýymyz kerek», - dedi ákim.