Elorda ákimi kezimde mindetimdi tıisti deńgeıde atqardym, jumysymnan qysylmaımyn – Altaı Kólginov
«Elorda ekonomıkasynyń negizgi draıveri - qurylys, sonymen qatar shaǵyn jáne orta bıznes salasy. Sondyqtan memlekettik organdardyń aldynda eń áýeli ınvestıtsııa tartý mindeti tur. Astanalyqtardy turǵyn úımen qamtý da mańyzdy. Tek 2021 jyldyń ózinde Otbasy banki arqyly kezekte turǵandar men salymshylarǵa 10 myń páter berildi. Onyń 7 myńy - kezekte turǵandarǵa. Eger sizderde qurylys, turǵyn úı salý boıynsha naqty faktiler bolsa, tyńdaýǵa daıynbyz. Faktiler burmalanbaı, naqty joba boıynsha keltirilgeni jón. Jalpy qurylysqa qatysty suraqtar boıynsha qala ákimdigine habarlasyńyz. Men ótken jyldan beri elorda ákimi emespin», - dedi Altaı Kólginov Úkimet otyrysynan keıin BAQ ókilderiniń saýalyna jaýap bere otyryp.
Sonymen qatar jýrnalıster Úkimet basshysynyń orynbasarynan elorda ákimi bolǵan kezdegi jumysy jaıly saýal joldady.
«Artyq áńgime kerek emes. Ol úshin jaýap beresiz. Bul memlekettik qyzmetkerdi kópshilik aldynda aıyptaý bolyp sanalady. Ondaımen aınalysýdyń qajeti joq, ol úshin jaýapkershilik qarastyrylǵan. Memlekettik qyzmetkerge qarsy ondaı shabýyldar bolyp turady, ol tapsyryspen jasalady. Elorda ákimi bolǵanda óz mindetimdi tıisti deńgeıde atqardym. Óz jumysymnan qysylmaımyn», - dedi A. Kólginov.