Elorda ákimi Altaı Kólginov JEO-3 qurylysyna qatysty pikir bildirdi

NUR-SULTAN. QazAqparat – Elorda ákimi Altaı Kólginov qaladaǵy JEO-3 qurylysy boıynsha merdigerge qatań talaptar qoıylǵanyn aıtty, dep habarlaıdy QazAqparat.

«JEO-3 boıynsha jumysty merdigerden talap etip otyrymyz. Qala aýmaǵynda qurylys qarqyndy ósip jatyr, sondyqtan bul úılerdiń barlyǵyn jylýmen qamtamasyz etý mindeti tur. 10 jyldan astam ýaqyt boıy JEO-3 qurylysy bitpeı jatyr. Osy oraıda merdiger jumysyn aıaǵyna deıin jetkizbese, olar sotta jaýap beretin bolady», - dedi A. Kólginov qalalyq máslıhattyń kezekten tys sessııasynda.

Onyń aıtýynsha, bul baǵyttaǵy jumystarǵa bıýdjetten tıisti qarajat qarastyrylǵan. Endi jumysty durys uıymdastyrý kerek.

«Merdiger jumysty jandandyrýǵa ýáde berdi. Atap aıtqanda, merdigerlerdiń kóbisi ózderine júktelgen senimge jaýapkershilikpen qaramaıdy. Bul turǵyda qoǵamdyq qadaǵalaý jumystaryna, onyń ishinde JEO-3 qurylysyn qadaǵalaýǵa máslıhat depýtattarynyń da qatysýy durys bolar edi. Jańa ǵımarttardy ýaqytyly jylýmen qamtamasyz etý úshin JEO-3 qurylysyn aıaqtaý kerek», - dedi qala ákimi.

Budan buryn habarlanǵandaı, qurylysy 10 jylǵa sozylǵan astanadaǵy JEO-3 bıyl iske qosylmaq .