Elorda ákimdigi «TsÝM» ǵımaratyn satyp aldy

NUR-SULTAN. QazAqparat - Qazirgi ýaqytta Nur-Sultan qalasy ákimdiginiń vedomstvolyq baǵynysty 30-dan astam uıymy men basqarmalary jeke tulǵalardan úı-jaılardy jalǵa alady. Osy sebepti jalǵa alynǵan oryndarǵa jyl saıyn 1 mıllıard teńgege jýyq aqy tóleıdi. Jaldaý quny jyl saıyn ósetinine nazar aýdarsaq, bul soma kóbeıe beredi, dep habarlaıdy qalalyq ákimdiktiń baspasóz qyzmeti.

Joǵaryda aıtylǵandardy jáne osy uıymdardyń túrli aýdandarda ornalasqanyn eskerer bolsaq, basqarmalar men ákimdikke vedomstvolyq baǵynysty uıymdar úshin jeke bir ǵımarat qajet. Osylaısha, «Sine Tempore» ǵımaratyn satyp alý arqyly qarajatty únemdep qana qoımaı, «bir tereze» qaǵıdaty boıynsha qyzmet kórsetýge múmkindik beredi (ǵımarat qalalyq ákimdiktiń janynda ornalasqan).

Aıta ketý kerek, 2020 jyly eki kompanııa atalmysh nysanǵa baǵalaý júrgizdi. Onyń negizinde bir kompanııa 12,6 mlrd teńgege baǵalasa, ekinshisi 11,7 mlrd teńgeni kórsetti. Al 2021 jyly taǵy bir táýelsiz baǵalaý júrgizildi, onyń qorytyndysy boıynsha 9,5 mlrd teńge kórsetilgen bolatyn.

Usynylǵan eń tómengi somaǵa ǵımaratty satyp alý qalalyq máslıhattyń kelisimimen júzege asyryldy.