Elorda ákimdigi 713 mln teńgege segiz qurylys nysanyn satyp alady

NUR-SULTAN. QazAqparat – Nur-Sultan qalasynyń ákimdigi 8 qurylysy nysany ornalasqan 75 jer ýchaskesin satyp almaq. Bul týraly qalalyq turǵyn úı jáne turǵyn úı ınspektsııasy basqarmasynyń basshysy Ánýar Saıpov málim etti, dep habarlaıdy QazAqparat tilshisi.

«Búgin qalalyq máslıhattyń qaraýyna 8 nysan boıynsha 75 jer ýchaskesin satyp alý týraly jobany usynamyz. Jer ýchaskeleriniń jalpy aýdany - 3 gektar. Jobanyń quny - 713 mln teńge», - dedi Ánýar Saıpov qalalyq máslıhattyń 25-shi kezekten tys sessııasynda.

Sondaı-aq, basqarma basshysy satyp alynatyn nysandardy atady.

«Birinshi nysan - Táýelsizdik dańǵyly men Sharl de Goll kóshesiniń qıylysyndaǵy turǵyn úı kesheni, ekinshisi - Sharl de Goll jáne Toqpanov kóshesi qıylysyndaǵy qurylys nysany, úshinshisi - Sh. Aıtmatov kóshesi boıynsha qurylys, kelesi joba - Esil ózeniniń arnasyn qaıta jóndeý. Sol sekildi Respýblıka dańǵyly men Altynemel, Qutpanov, Gete kósheleriniń qıylysyndaǵy kóppáterli turǵyn úı kesheni jáne Qosshyǵululy kóshesindegi 8 turǵyn úıdi abattandyrý jumysy bar. Qabanbaı batyr dańǵyly men Hýseın ben Talal kóshesindegi ákimshilik ǵımarat qurylysy jáne Turǵan dańǵyly men №227 kóshesiniń qıylysynda ornalasqan ákimshilik ǵımarattyń qurylysy da osy tizimge kiredi», - deıdi ol.

Onyń aıtýynsha, joǵaryda atalǵan jer ýchaskeleriniń ıeleri ákimdik usynǵan ótemaqy kólemimen tanys.