Elimizge syrtqy saýda aınalymnan qansha kedendik salyq tústi

<p>ASTANA. KAZINFORM &ndash; Qazaqstannyń úshinshi álem elderimen syrtqy taýar aınalymy 2024 jyldyń 5 aıynda 0,5%-ǵa artyp, 44,6 mlrd AQSh dollaryn quraǵan. Bul &ndash; ótken jyldyń sáıkes kezeńimen salystyrǵanda 5,5%-ǵa kóp.</p>

Ortalyq kommýnıkatsııalar qyzmeti alańynda ótken brıfıngte QR QM Memlekettik kirister komıteti tóraǵasynyń mindetin atqarýshy Eldos Saýdabaev bıyl ımport aınalymy 16,1 mlrd AQSh dollaryn quraǵanyn aıtty.

«Bıyl 5 aı ishinde 1,346 trln teńge somasynda kedendik tólemder jáne salyqtar tústi. Kedendik ákimshilendirý sharalary esebinen bıýdjetke qosymsha 62,5 mlrd teńge óndirildi», – dedi ol.

Belgili bolǵandaı, «Biryńǵaı tereze» portalynda jekelegen ruqsat berý qujattary, sondaı-aq sáıkestikti rastaý jónindegi organdar beretin sáıkestik týraly sertıfıkattar men deklaratsııalar, kólik quraly konstrýktsııasynyń qaýipsizdigi týraly kýálikter avtomattandyrylǵan.

Budan bólek, keden salasyndaǵy birqatar memlekettik qyzmet iske qosylǵan. Mysaly, taýarlardy jikteý, taýarlardy jınalmaǵan nemese bólshektelgen túrde shyǵarylǵan elde jikteý, kedendik qundy anyqtaý ádisi, ýaqytsha saqtaý oryndarynyń tizimine engizý sııaqty qyzmetter bar.

Sondaı-aq rastaıtyn qujattar men málimetterdi birneshe ret usyný qajettiligin boldyrmaý maqsatynda basqa uıymdarmen 19 ıntegratsııa iske asyrylǵan.

«Taýarlardyń eksporty-ımporty úshin kórsetiletin qajetti qyzmetterdiń «biryńǵaı tereze» portalyndaǵy kedendik operatsııalardyń ashyqtyǵyn qamtamasyz etýge, kórsetiletin qyzmetti berýshiler men kórsetiletin qyzmetti alýshylardyń fızıkalyq baılanysyn boldyrmaýǵa, sondaı-aq qyzmet kórsetý merzimderi 30-dan 2 kúnge deıin qysqartylǵan kezde qujattardy alýdy jáne kedendik resimdeýdi tezdetýge múmkindik berdi. Memlekettik kirister komıteti búginde EAEO syrtqy shekarasyndaǵy barlyq avtomobıl ótkizý pýnktinde jumys isteıtin ınnovatsııalyq elektrondyq kezek júıesin engizdi. Bul joba oń nátıje kórsetti. Biz bul júıeni Reseı Federatsııasy men Qyrǵyzstannyń shekara beketterinde engizý jumystaryn júrgizip jatyrmyz», - dep atap ótti spıker.

Júıe «Qoldau.kz» platformasynda jáne «cargoruqsat» mobıldi qosymshasy arqyly jumys isteıdi. Ortalyq Azııadaǵy biregeı avtomattandyrylǵan júıe shekaradan ótý protsesin túbegeıli ózgertkenin atap ótken jón.