Elimizge maımyl sheshegi enip ketpes úshin qandaı sharalar jasalyp jatyr

<p>ASTANA. KAZINFORM - QR Densaýlyq saqtaý mınıstrligi álemdegi maımyl shesheginiń aǵymdaǵy jaǵdaıy týraly jáne elimizdiń aýmaǵynda ınfektsııanyń taralýyn boldyrmaý boıynsha qabyldanǵan sharalar týraly málimet jarııalady.</p>

Vedomstvonyń málimdeýinshe, búgingi tańda Qazaqstan Respýblıkasynda maımyl shesheginiń birde-bir jaǵdaıy tirkelgen joq.

Densaýlyq saqtaý mınıstrligi ınfektsııany elge ákelýdiń aldyn alý úshin qajetti sharalardy qabyldady.

Áýejaılar men shekara ótkelderin qosa alǵanda, sanıtarııalyq-karantındik pýnktterde baqylaý sharalary kúsheıtildi. Maımyl sheshegi tirkelgen elderden kelgen azamattarǵa nazar aýdarylady.

Infektsııanyń yqtımal taralýyn boldyrmaý úshin Densaýlyq saqtaý mınıstrligi endemııalyq elderge sapar shegýdi josparlap otyrǵan azamattarǵa kelesideı saqtyq sharalaryn saqtaýdy usynady:

1. Aýrý adamdarmen jáne jabaıy janýarlarmen baılanysta bolýdan aýlaq bolyńyz. Vırýs juqtyrǵan maımyldarmen, egeýquıryqtarmen jáne basqa janýarlarmen baılanysta bolýy múmkin.

2. Qorǵanys quraldaryn qoldanyńyz. Janýarlarmen nemese olardyń ónimderimen baılanysta bolǵan kezde qorǵanys kıimderi men qolǵaptaryn qoldaný mańyzdy.

3. Gıgıenany saqtaý. Qoldy únemi jýý jáne dezınfektsııalaý quraldaryn qoldaný ınfektsııanyń taralý qaýpin azaıtýǵa kómektesedi.

4. Asa qajettilik týyndamasa, maımyl sheshegi tirkelgen elderge shyqpaýǵa keńes beremiz.

5. Alǵashqy belgiler paıda bolǵan kezde dárigerge júginińiz. Eger bórtpe, joǵary temperatýra jáne basqa da belgiler paıda bolsa, dereý medıtsınalyq kómekke júginý kerek.

QR Densaýlyq saqtaý mınıstrligi epıdemıologııalyq jaǵdaıdy baqylaýda jáne kez kelgen ózgeristerge jedel den qoıýǵa daıyn ekenin habarlady.