Elimizge bosqyndar kóbine qaı elderden kelgen
QR Eńbek jáne halyqty áleýmettik qorǵaý mınıstrligi Kóshi-qon komıteti tóraǵasynyń orynbasary Erbolat Abýlhatın elimizge pana izdep kelgender men bosqyndar týraly málim berdi.
«2024 jylǵy 1 qyrkúıektegi jaǵdaı boıynsha elimizde pana izdegen 368 adam jáne 310 bosqyn turady. Bosqyndar men pana izdeýshilerdiń basym bóligi Almaty qalasynda ornalasqan. Osy oraıda, yntymaqtastyqty damytý jáne keńeıtý maqsatynda Eńbek mınıstrligi men BUU Bosqyndar komıssııasy jónindegi Joǵarǵy komıssarynyń basqarmasy arasynda ózara túsinistik týraly memorandým jasaldy», - dedi E. Abýlhatın.
Eńbek mınıstrliginiń málimetine qaraǵanda, pana izdeýshilerdiń 175-i Ýkraınadan, 136-sy Aýǵanstannan, 19-y Reseıden jáne 39-y basqa elderden. Al bosqyndardyń 213-y Aýǵanstannan, 87-si Ýkraınadan, beseýi QHR-dan, úsheýi Sırııadan, sondaı-aq bireýi Ózbekstannan kelgen.
Іshki ister mınıstrligi Kóshi-qon qyzmeti komıtetiniń tóraǵasy Aslan Atalyqovtyń sózine qaraǵanda, bıyl elimizge 10 mln 200 myń sheteldik saparlap kelgen. Olardyń kópshiligi TMD elderiniń azamattary (90%) sanalady.
«Qazir elimizde 196 myń sheteldik turaqty turyp jatyr. Onyń 42 myńy etnıkalyq qazaqtar sanatynda. Sheteldikterdiń kópshiligi Almaty men Astana qalalarynda jáne Almaty oblysynda ornalasqan. Jyl basynan beri jarty mıllıonǵa jýyq (476 945) sheteldik ýaqytsha turýǵa ruqsat aldy, onyń 90 paıyzy eńbek etý maqsatymen», - dedi A. Atalyqov.