Elimizdiń qaı óńirinde iri qara kóp

<p>ASTANA. KAZINFORM — Sońǵy jyldarda aýyl turǵyndarynyń eshki ósirýge nıetti emes ekenin statıstıkaǵa súıenbeı-aq aýylǵa barǵan kezde kóz jetkizýge bolady. Jylqy ustaýǵa báriniń birdeı shamasy jete bermeıdi. Qoıdyń baǵasy pandemııa kezinde kúrt ósip, turǵyndar usaq maldy ósirýge qaıtadan qyzyǵýshylyq tanyta bastady. Al elimizde Zeńgi baba túliginiń ahýaly qandaı?</p>

Aýyl sharýashylyǵy mınıstrliginiń agenttik tilshisine bergen málimetinshe, bıyl 1 qańtarǵa deıin elimizde 8,6 mln iri qara tirkelgen. Bul — ótken jyldyń sáıkes kezeńimen salystyrǵanda 0,8%-ǵa joǵary.

— Aýyl sharýashylyǵy kásiporyndaryndaǵy iri qara sany 4,4 mıllıonǵa teń. Jeke aýlada 4,2 mln bas bar. 1990 jyldary iri qara sany 9,7 mln basty quraǵan bolatyn. 2000 jyldary birshama azaıyp, 4,1 mln bas tirkeldi. Búginde iri qara sany 20 jyl ishinde 2 ese artyp otyr, — deıdi Aýyl sharýashylyǵy mınıstrliginiń baspasóz qyzmeti.

Óńirlerge toqtalsaq, Túrkistan oblysy kósh bastap tur. Bul aımaqta 1 082,7 myń bas iri qara bar eken.

Batys Qazaqstan oblysynda — 856,7 myń bas, al Abaı oblysynda 696,6 myń bas sıyr tirkelgen.

Sondaı-aq, Aqmola oblysynda — 453,2 myń bas, Aqtóbe oblysynda — 669,2 myń bas, Almaty oblysynda — 657,3 myń bas, Atyraý oblysynda — 203,7 myń bas, Jambyl oblysynda — 530,2 myń bas, Jetisý oblysynda — 515,5 myń bas, Qaraǵandy oblysynda — 486,4 myń bas, Qostanaı oblysynda — 477,3 myń bas, Qyzylorda oblysynda — 409,7 myń bas, Mańǵystaý oblysynda — 21,4 myń bas, Pavlodar oblysynda — 480,1 myń bas, Soltústik Qazaqstan oblysynda — 379,9 myń bas, Ulytaý oblysynda — 149,3 myń bas, Shyǵys Qazaqstan oblysynda — 439,6 myń bas, Shymkent qalasynda — 97,6 myń bas iri ósiriledi.