Elimizdiń batys óńirinde jol jaǵdaıy nege nashar – mınıstr jaýaby

<p>Buryn qaı óńirdiń qujaty daıyn boldy, solarǵa qarjy bólindi. Endi eń nashar joldarǵa qarjy bólý ádistemesi qoldanylady. Bul týraly QR Kólik mınıstri Marat Qarabaev aqtóbeliktermen kezdesýde aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Kólik mınıstri Marat Qarabaevpen kezdesý týraly aldyn ala habarlanyp, oǵan kóbine qoǵam belsendileri men jaýapty mekeme ókilderi qatysty. Jıyn kezinde aqtóbelik qoǵam belsendisi Estaı Jaılybaı birneshe suraq qoıyp, elimizdiń batys óńirindegi joldyń tym nashar ekenin aıtty.

«Memleket bir, respýblıka bireý. «Barlyǵy batystan shyǵyp jatyr, nege batysqa berilmeı jatyr?» degen shyndyqqa jatpaıdy. Eldi batys, shyǵys, ortalyq dep bólýge bolmaıdy. Respýblıkalyq bıýdjet bir. Bárine tıisti deńgeıde bólinedi. Eń jamany Batys Qazaqstan, Atyraý, Aqtóbe dep durys aıttyńyz. Osy ýaqytqa deıin qalaı boldy? Osy ýaqytqa deıin qaı óńirdiń qujaty daıyn boldy, ortalyq soǵan aqsha bóldi. Eger qujatty óńirdegi áriptester ýaqytyly tapsyryp, ýaqytyly bıýdjetten almaǵan bolsa, ol ortalyqtyń kinási emes. Baryp, durystap jumys isteý kerek edi ortalyqpen, qarjy bóletin mınıstrlermen. Byltyr jańa metodıka qabyldady. Kimde joldyń jaǵdaıy tómen bolsa, soǵan aqsha kóp bólinedi. Nátıjesinde 2022 jyly Aqtóbege 8 mlrd teńge, bıyl 14,7 mlrd teńge bólindi. Batysqa durys kóńil bólinbeı jatyr degen áńgime shyndyqqa jatpaıdy. Eń kóp aqsha alǵan batys. Batys Qazaqstanda Kaztalovka-Jánibek baǵytynda múlde jol bolmaǵan. Qazir salynyp jatyr. 2021-2022 jyldarmen salystyrǵanda bıyl búkil batys óńirine bólingen qarjy 50% ósip otyr», - dedi mınıstr.

Aıta keteıik, qazir eń iri Aqtóbe-Qarabutaq-Ulǵaısyn baǵytyndaǵy tasjoldyń jobalyq-cmetalyq qujaty ázirlenip jatyr. Qurylys úshin shamamen 500 mlrd teńden astam qarjy qajet.

«Úkimet basshysy jobaǵa qarjy bólý usynysyn qoldady. Oǵan 18 mlrd teńge bólindi. Aqtóbe qalasynan bastalatyn joldyń ​ 2-56 shaqyrym aralyǵy keler jyly bastalady. Qurylysty túgel bıýdjet qarjysyna salý múmkin emes ekenin bilemiz. Shynyn aıtqanda, Qyzylordadan Reseıge deıingi tranzıttik jolǵa 1 trln teńge kerek negizi. Sondyqtan qarjy kózi Dúnıejúzilik bank, Azııa damý banki nemese Eýropalyq qaıta qurý jáne damý banki bolýy múmkin. Mańyzdysy – qazir merdigerdi anyqtaý. Qosymsha qarjy mindetti túrde qarastyrylady», - dedi QR Kólik mınıstri Marat Qarabaev.

Eske salsaq, bul jol eki jolaqtan tórt jolaqqa keńeıtiledi. Sonymen birge aınalma joldar salynady.