Elimizdiń aýmaǵynda sý shaıǵan joldardy jóndeý qashan aıaqtalady

<p>ASTANA. KAZINFORM &ndash; QR Kólik mınıstrligi bıyl kóktemdegi sý tasqyny kezinde elimizdiń aýmaǵynda sý shaıyp ketken joldarǵa qatysty túsinik berdi.</p>

«Sý tasqyny kezeńinde halyqaralyq jáne respýblıkalyq mańyzy bar avtojoldardyń ýchaskelerinde 169 sý basý jaǵdaıy tirkeldi. Munyń saldarynan 11 óńirde jol jıekteri men jol tósemderiniń shaıylýy (uzyndyǵy 33 km), sondaı-aq «Samara - Shymkent» (1132 km) jáne «Qandyaǵash - Shalqar - Yrǵyz» avtojoldarynda 4 kópirdiń zaqymdanýy tirkeldi. Sonymen qatar, eldi mekenderdi sý basýǵa jol bermeý úshin Qaraǵandy, Pavlodar, Qostanaı jáne Soltústik Qazaqstan oblystaryndaǵy avtojoldardyń 9 ýchaskesinde jol tósemin májbúrli túrde buzý júrgizildi. Avtojoldardyń barlyq ýchaskelerinde erigen qar sýy deńgeıiniń tómendeýine qaraı avtokólik quraldarynyń qaýipsiz jáne úzdiksiz ótýi qamtamasyz etildi», - delingen Kólik mınıstrliginiń Kazinform agenttigine bergen jaýabynda.

Avtojoldar men jol nysandarynyń zaqymdalǵan ýchaskelerin qalpyna keltirý úshin sáýir aıynan bastap bıylǵa bólingen qarajatpen jol jóndeý jumystary bastaldy. Máselen, qazir sý tasqyny saldaryn joıý boıynsha jumystar 89 ýchaskedegi aıaqtaldy, 10 ýchaskede jumystar jalǵasyp jatyr, al 20 ýchaskede qalpyna keltirý jumystar josparlanǵan. 

«Jergilikti mańyzy bar avtojoldarda 10 óńir boıynsha 273 ýchaskede buzylǵan jerleri bar. Avtojoldardyń eń kóp zardap shekken ýchaskeleri Batys Qazaqstan (65 ýchaske), Qaraǵandy (39 ýchaske), Aqtóbe (39 ýchaske) jáne Aqmola (38 ýchaske) oblystarynda tirkelgen. Kólik qatynasyn qamtamasyz etý úshin 269 ýchaskede qozǵalys qalpyna keltirildi. Bul turǵyda Qaraǵandy, Qostanaı, Shyǵys Qazaqstan, Batys Qazaqstan, Soltústik Qazaqstan, Abaı jáne Ulytaý oblystarynda kólik qozǵalysy tolyq qamtamasyz etildi. Aqmola oblysynda bir ýchaske boıynsha kólik qatynasyn qalpyna keltirý jumystary atqarylyp jatyr. Al Atyraý men Aqtóbe oblystaryndaǵy 3 ýchaskede jumystar erigen sýdyń deńgeıi tómendegennen keıin bastalady. Qazirgi kezde oblys ákimdikteri qajet jumys túrlerin (rekonstrýktsııalaý, kúrdeli, ortasha jáne aǵymdaǵy jóndeý) aıqyndaı otyryp, qujattamalardy ázirleý boıynsha tıisti jumystardy júzege asyryp jatyr», - dep atalyp ótken vedomstvo aqparatynda. 

Eske salsaq, bir apta buryn Atyraý-Oral trassasynan Inderborǵa burylatyn 7 shaqyrym joldy tasqyn sý shaıyp ketti.