Elimizdiń 12 óńirinde balalardy ońaltý ortalyqtary salynady
«Halyqty áleýmettik qorǵaý salasynda múgedektigi bar balalarǵa týyndaǵan áleýmettik problemalardy eńserý jáne qoǵam ómirine teń jaǵdaılarda qatysý múmkindikterin qalyptastyrý maqsatynda arnaýly áleýmettik qyzmetter usynylady. Áleýmettik qorǵaý júıesinde 90-ǵa jýyq balany qamtı otyryp, tirek-qımyl apparaty buzylǵan balalarǵa arnalǵan statsıonarlyq úlgidegi 4 áleýmettik qyzmet kórsetý ortalyǵy, 1,4 myńnan astam balany qamtıtyn psıhonevrologııalyq patologııasy bar balalarǵa arnalǵan statsıonarlyq úlgidegi 17 áleýmettik qyzmet kórsetý ortalyǵy jumys isteıdi. 78 kúndizgi uıymda 4 myńǵa jýyq bala qyzmet alady. Sondaı-aq, 1,8 myńǵa jýyq balaǵa 23 ońaltý ortalyǵy jaǵdaıynda arnaýly áleýmettik qyzmetter kórsetiledi», - dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, jartylaı statsıonarlyq jáne úıde qyzmet kórsetýdiń memlekettik uıymdarymen qatar arnaýly áleýmettik qyzmetterdi 10 myńnan astam adamǵa, onyń ishinde 5 myńnan astam múgedektigi bar balalarǵa arnalǵan 182 úkimettik emes uıym usynady.
«Budan basqa, mınıstrlik jergilikti atqarýshy organdarmen birlesip, 2021-2025 jyldar aralyǵynda elimizdiń 12 óńirinde 150 oryndyq ońaltý ortalyqtaryn salýdy josparlady. 2023 jyly ońaltý ortalyǵy Abaı oblysynyń Semeı qalasynda jáne Jambyl oblysynyń Taraz qalasynda iske qosyldy. Búginde 5 óńirde, atap aıtqanda Túrkistan, Batys Qazaqstan, Aqmola, Atyraý, Aqtóbe oblystarynda qurylysy jalǵasyp jatyr. Al, 5 óńir Astana, Almaty, Shymkent, Jetisý, Pavlodar óńirlerinde) jer ýchaskelerine jobalaý-smetalyq qujattamany baılanystyrý jáne tıisti qujattardy daıyndaý jumystary júrgizilýde», - dedi Ǵalııa Jabaǵına.