Elimizdegi sportshylardyń nátıjesi tómendep ketti – Premer-mınıstr
- Ózderińiz biletindeı, memleket salaýatty ómir saltyn damytyp, halyqty dene shynyqtyrýmen aınalysýǵa tartý úshin keshendi sharalar qabyldaýda. Memleket basshysynyń tapsyrmasy boıynsha buqaralyq sportqa, sport ınfraqurylymyn, sport rezervi men joǵary jetistikter sportyn damytýǵa basa mán berilip otyr. Jyl ótken saıyn memleket tarapynan sportty qarjylandyrý kólemi artyp keledi. Respýblıka boıynsha 5 jyl ishinde 215 dene shynyqtyrý kesheni, 17 júzý basseıni, 57 sport maneji jáne 1,5 myńnan astam sport alańy salyndy. Jeke ınvestorlar esebinen 92 joba iske asyryldy. Deı turǵanmen, sportshylarymyzdyń nátıjesi tómendep ketti. Munyń negizgi sebepteri olardy júıeli daıyndaý jumystarynyń bolmaýynda. Jattyqtyrýshy quramnyń jetispeýshiligi jáne tıimdi daıyndyq ádisteriniń joqtyǵy da nátıjelerge teris áser etti, - dedi O. Bektenov.
Onyń aıtýynsha, sportshylardy balalar sektsııalarynan bastap olımpıadalyq qurama komandalarǵa deıin tárbıeleýdiń naqty júıesi joq. Sonymen qatar sport túrleri boıynsha óńirler arasyndaǵy básekelestik tómen.
- Respýblıkalyq deńgeıdegi jarystar, túrli týrnırler talantty sportshylardy anyqtaýǵa múmkindik beredi. Memleket basshysy joǵary jetistikter sportyna qatysty naqty mindetter qoıdy. Bul rette sport túrlerin tańdaý ǵylymı turǵyda negizdelip, elimizge tán erekshelikterge súıene otyryp jasalýy kerek. Atalǵan máseleniń sheshimi sport federatsııalarynyń qyzmetin, olardyń halyqaralyq, respýblıkalyq jáne jergilikti deńgeılerdegi jumysyn da retteýge tıis. Sondaı-aq, Týrızm jáne sport mınıstrligi jergilikti atqarýshy organdarmen birlesip, balalar men jasóspirimder sportyn damytý, sport mektepteri men sektsııalaryn qurý jáne qoldaý jóninde sharalar qabyldaýy qajet.
Sporttyq medıtsınany damytý jumysyn jandandyrý kerek. Bárimiz qazaq sportynyń básekege qabiletti bolýy úshin kúsh-jigerimizdi jumyldyrýǵa tıispiz, - dedi Úkimet basshysy.
Budan buryn habarlanǵandaı, búgin Úkimet otyrysynda QR Týrızm jáne sport mınıstri Erbol Myrzabosynov elimizde qysqy sport túrleriniń damýyna qatysty túsinik berdi.