Elimizdegi shetel ýnıversıteti fılıaldarynda «Qazaq tili», «Qazaqstan tarıhy» pánin oqytý mindetteledi

<p>ASTANA. KAZINFORM &ndash; Búginde Qazaqstanda 27 sheteldik joǵary oqý ornynyń fılıaly ashylǵan.</p>

«Negizi «fılıal» ataýy kópshiliktiń qabyldaýyna yńǵaılyraq bolýy úshin qoldanylady. Al shyn máninde bulardy «strategııalyq seriktestik» dep ataý durysyraq bolady. Kóp jaǵdaıda qazaqstandyq joǵary oqý orny negizinde sheteldik ýnıversıtetterdiń oqý baǵdarlamalaryn oqytatyn bólek birlik qurylady. Bul fılıaldar ulttyq zańnamaǵa sáıkes Ádilet mınıstrliginde eseptik tirkeýge turady. Sonymen qatar, basqa JOO-nan táýelsiz bólek ornalasqan fılıaldar da bar, bulardyń bir bóligi jeke zańdy tulǵa retinde tirkelse, basqalary eseptik tirkeýge turady», - dep túsindirdi Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Janna Esinbaeva agenttik joldaǵan saýal jaýabynda.

Onyń aıtýynsha, elimizde shetel ýnıversıtetteriniń fılıalyn ashýǵa eki jaqtan da qyzyǵýshylyq bar. Bastapqyda qazaqstandyq JOO sheteldik seriktesterine fılıal ashý týraly usynys jasaǵan bolsa, sońǵy ýaqytta keıbir sheteldik ýnıversıtetter Ǵylym jáne joǵary bilim mınıstrligine tikeleı nemese qazaqstandyq ýnıversıtetterge tıisti usynyspen kelip jatyr.

«Otandyq jáne sheteldik ýnıversıtetterdiń fılıaldarynyń qyzmeti 2007 jylǵy 27 shildedegi №319 Bilim týraly zańyna sáıkes retteledi. Sheteldik fılıaldar QR joǵary bilim zańnamasynda kózdelgen standarttar men talaptardy saqtaýǵa mindetti. Sondaı-aq, mınıstrlik zańnamada belgilengen tártippen tıisti baqylaý júrgizedi. Sonymen qatar bilim berý qyzmeti bilim berý qyzmetin júrgizýge arnalǵan lıtsenzııa alý negizinde júzege asyrylady», - deıdi ol.

Elimizde ashylǵan sheteldik ýnıversıtetter kelesi talaptardy oryndap, sharttardy qamtamasyz etýi tıis:

- Bilim berý baǵdarlamalarynyń tizilimge sáıkes kelýi;

- oqytýshylar quramy;

- oqý, oqý-ádistemelik jáne ǵylymı ádebıettermen qamtylǵan kitaphana qory;

- oqý korpýstary men úı-jaılary (aýdıtorııalar, kabınetter, sheberhanalar, sport zaldary, stýdııalar, zerthanalar, akt zaly, kitaphana);

- bilim alýshylardyń tamaqtanýyn jáne medıtsınalyq qyzmet alýyn uıymdastyrý úshin qajetti jaǵdaı;

- muqtaj bilim alýshylardyń turýy úshin jaǵdaılar (jataqhanalar/hostelder/ qonaq úıler);

- ınternet;

- kompıýterlik kabınetter, kompıýterler, mamandandyrylǵan lıtsenzııalyq baǵdarlamalar, oqý-zerthanalyq jáne materıaldyq-tehnıkalyq baza, bilim berý baǵdarlamalaryn iske asyrý úshin qajetti jabdyqtar.

«Sondaı-aq, joǵary jáne joǵary oqý ornynan keıingi bilim berýdiń memlekettik jalpyǵa mindetti standarty boıynsha da qoıylatyn talaptar bar. Olardyń negizgisi oqý baǵdarlamasyna «Qazaq tili» jáne «Qazaqstan tarıhy» pánderin mindetti túrde engizý. Odan bólek, fılıaldyń professorlar-oqytýshylar quramynyń jalpy sanynyń keminde 30%-yn sheteldik professorlar-oqytýshylar bolýy tıis. Árıne, fılıaldarǵa jergilikti mamandar da tartylady», - deıdi J.Esinbaeva.