Elimizdegi mektepterde tamaqtanýdyń jańa modeli engizildi

<p>Elimizde ázirlengen jańa model mektepte tamaqtaný mádenıetin qalyptastyrýdyń kezeńdik is-sharalar keshenin qamtıdy. Pılottyq joba Astana qalasynyń alty mektebinde júzege asyrylyp jatyr, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;&nbsp;</a></p>

Atalǵan model Oqý-aǵartý mınıstrliginiń bastamasymen Ulttyq salaýatty tamaqtaný ortalyǵymen birlesip quryldy.

Birinshi kezeńde mekteptegi tamaqtanýdy uıymdastyrýdy baǵalaý jáne taldaý maqsatynda balalardyń mektep ashanasyndaǵy minez-qulqynyń úlgilerin baıqap, zertteý, antropometrııalyq kórsetkishterdi ólsheý (boıy, salmaǵy) jáne durys tamaqtaný qaǵıdattaryn bilýge saýalnama júrgiziledi.

Ekinshisinde salaýatty ómir salty salasyndaǵy bilim men tájirıbeni baıytý úshin jetkizýshilerdi, mektep personalyn, oqýshylardy jáne olardyń ata-analaryn oqytý uıymdastyrylady.

Úshinshi kezeń balalardyń durys tamaqtanýyna jáne fızıologııalyq qajettilikterin esepke alýǵa basa nazar aýdara otyryp, oqýshylardyń tamaqtanýyn retteıtin normatıvtik-quqyqtyq qujattardy úılestirýdi bildiredi.

Tórtinshi kezeńde balalardyń densaýlyǵyn saqtaýǵa baǵyttalǵan mektepte tamaqtanýdyń jańa modelin ázirleý kózdelip otyr. Bul úderis densaýlyqty saqtaýǵa yqpal etetin bilim berý ortasyn qalyptastyrý maqsatynda úılestirilgen tásildi qamtamasyz etpek.

Sońǵy kezeń – engizilgen ózgeristerdiń monıtorıngi jáne tıimdiligin baǵalaý.

Aıta keteıik, buǵan deıin Oqý-aǵartý mınıstrligi tamaqtanýdy uıymdastyrýdyń qaýipsiz jaǵdaılaryna áser etetin krıterıılerdi zerttegen bolatyn. Soǵan sáıkes Ulttyq dástúrge jáne óńirde óndiriletin otandyq ónimderdiń assortımentine sáıkes mázir ázirlendi.

Osy jyldyń 1 qyrkúıeginen bastap alǵash ret 1,6 mıllıonnan astam oqýshy, onyń ishinde 1,4 mıllıonnan astam bastaýysh synyp oqýshylary jáne 220 myń HÁOT sanatyndaǵy 5-11 synyp oqýshylary tegin tamaqpen qamtyldy.