Elimizdegi qaı áýejaılardy damytýǵa ınvestor kelýi múmkin

<p>ASTANA. KAZINFORM &ndash; Kólik mınıstrligi áýejaılar qyzmetine ınvestorlar tartýǵa qatysty túsinik berdi.&nbsp;</p>

«Qazaqstan Respýblıkasynyń 1994 jylǵy 27 jeltoqsandaǵy Azamattyq kodeksiniń 193-1-babynyń 2-tarmaǵyna sáıkes, halyqaralyq áýejaılar strategııalyq obektilerge jatqyzylǵan jáne Qazaqstannyń zańnamalyq aktileri boıynsha memlekettik jáne jeke menshikte bolýy múmkin. Álemdik tájirıbede tek qarjylyq resýrstarǵa ǵana emes, sonymen qatar áýejaılardy basqarýda aıtarlyqtaı tájirıbesi bar jeke ınvestorlar belsendi túrde tartylyp otyr. Jeke ınvestıtsııalardy tartý avıatsııa salasyn, týrızmdi, saýdany jáne el óńirleriniń ekonomıkalyq ósýin damytý úshin jańa múmkindikter ashady», - delingen mınıstrliktiń Kazinform agenttigine bergen jaýabynda.

Qazaqstanda respýblıkalyq jáne oblystyq mańyzy bar 20 áýejaı bar, onyń ishinde 10 memlekettik (Aqtóbe, Túrkistan, Qyzylorda, Pavlodar, Óskemen, Taldyqorǵan, Qostanaı, Balqash, Atyraý, Semeı qalalary), 5 jeke (Almaty, Taraz, Oral, Qaraǵandy, Jezqazǵan qalalary) jáne taǵy beseýi senimgerlik basqarýda (Astana qalasy, Kókshetaý, Shymkent, Aqtaý, Petropavl). 

«Sonymen qatar QR Syrtyqy ister mınıstrligi konsýldyqtary arqyly sheteldik ınvestorlardy tartý jumystary jalǵasyp jatyr. Osylaısha, «The Hansa Consortium» kompanııasy Aqtóbe qalasynyń áýejaıynda mýltımodaldy hab, avıatsııalyq tehnıkalyq ortalyq qurý jobasyn iske asyrýǵa, jolaýshylar jáne júk tasymaly kólemin edáýir arttyrýǵa, jańa jumys oryndaryn ashýǵa múddeli. Investor Aqtóbe qalasynyń jańa áýejaıyn salý ári basqarý boıynsha iri ınvestıtsııalyq jobany (joba quny 500 mln dollar) iske asyra alatynyn atap ótti. Sondaı-aq Aqtóbe oblysynyń ákimdigi jáne «Sovico Group» kompanııasy birneshe kezdesip, sonyń nátıjesinde áleýetti ınvestor yntymaqtastyqty nyǵaıtýǵa nıet bildirdi. Olar jergilikti atqarýshy organdarmen birlesip áýejaılardy basqarýdyń oryndylyǵy týraly túpkilikti sheshim qabyldaý úshin Aqtóbe jáne Túrkistan qalalary áýejaılarynyń qyzmetin (ákimdikterdiń balansynda) saraptaýǵa kirisýdi josparlap otyrǵanyn habarlady», - dep atalyp ótken Kólik mınıstrligi aqparatynda.

Eske salsaq, jyl basynda Kólik mınıstrligi 22 áýejaıdy ınvestorlardyń basqarýyna berýdi josparlap otyrǵany habarlanǵan.