Elimizdegi 32 sport federatsııasy tasqynnan zardap shekkenderge kómek kórsetti

<p>ASTANA. &nbsp;KAZINFORM - Qazaqstandaǵy 32 sport federatsııasy tosynnan kelgen tabıǵı apatqa tap bolǵan aımaqtarǵa materıaldyq, onyń ishinde altaýy qarjylaı kómek kórsetti.&nbsp;</p>

QR Týrızm jáne sport mınıstrligi atap ótkendeı vedomstvo «Dala Qyrandary» qoǵamdyq birlestigimen kúsh biriktirip, halyqqa birlese kómek qolyn sozyp jatyr. Sport uıymynyń ókilderi gýmanıtarlyq kómekti qabyldaý jáne halyqqa taratý pýnktterin uıymdastyrýda erikti retinde eńbek etip júr. 

Sý tasqynyna qarsy is-sharalarǵa 7 700-den astam sala mamany men sportshy tartylǵan. Olardyń arasynda aralas jekpe-jek sheberi Vasılıı Tahtaı, grek-rım kúresinen Azııa chempıony, London Olımpıadasynyń qatysýshysy Ashat Dilmuhamedov, halyqaralyq dárejedegi sport sheberi Nurǵalı Tursynǵazıev, «Qazaq kúresi» assotsıatsııasynyń BQO boıynsha prezıdenti Áset Sultanuly jáne taǵy basqa da tanymal sportshylar bar. 

«Bes oblysta 13 sport nysany sý astynda qaldy. Qysqa merzimde atalǵan sport keshenderin qalpyna keltirý josparlanǵan. Degenmen halyqtyń yntymaq-birliginiń nátıjesinde bul tyǵyryqtan da shyǵarymyz anyq. El Prezıdenti óz Úndeýinde atap ótkendeı, zardap shekkenderge memleket tarapynan tıisti qoldaý kórsetiledi», - dedi Ermek Marjyqpaev. 

Eske salsaq, búgin elordada bokstan irikteý týrnıriniń fınaldyq kezdesýinde tórt salmaqta jeńimpaz anyqtalǵanyn habarlaǵan edik.