Elimizde jyl saıyn júzden astam áskerı ushqysh daıarlanady
«Bizdiń ınstıtýt 7 mamandyq 15 biliktilik boıynsha áýe qorǵanysy kúshteri mamandaryn daıarlaıdy. Olardyń qatarynda áskerı avıatsııa, ıaǵnı ushqyshtar, áskerı medıtsına jáne áskerı teńiz kúshteri bar. Kýrsanttar 4 jyl oqıdy, sol bilim alyp, praktıkalyq turǵydan shyńdalady. Kýrsanttar MI-8 tikushaǵynan bólek L 39, FK 14, TL 2000, L 410 ushaqtarynda biliktiligin is júzinde arttyrady», - dedi Áýe qorǵanysy kúshteri áskerı ınstıtýty bastyǵynyń oqý-ǵylym jónindegi birinshi orynbasary, podpolkovnık Sábıt Kýrtaev Qorǵanys mınıstrliginiń uıymdastyrýymen ótken BAQ ókilderine arnalǵan baspasóz týry barysynda.
Ujymdyq qaýipsizdik kelisimi aıasynda áýe qorǵanysy kúshteri áskerı ınstıtýtynda elimizden bólek Tájikstan, Qyrǵyzstan elderinen kýrsanttar oqyp, áskerı ushqysh mamandyǵyn meńgerip jatyr.
«Kýrsanttar tegin oqıdy, biraq oqýdy bitirgen soń kelisim boıynsha áýe qorǵanysy kúshteri salasynda 10 jyl qyzmet etýge mindetti. Sonymen qatar kýrsanttarǵa joǵary oqý ornyn támamdaǵan soń leıtenant sheni beriledi. Eń bastysy kýrsanttar 100 paıyz jumyspen qamtylyp, áskerılerge tıesili áleýmettik qoldaý kórsetiledi», - deıdi ol.
Áskerı ushqysh bolǵysy keletin talapkerler úsh kezeńnen turatyn synaq tapsyrady. Aldymen jasóspirimniń psıhologııalyq jaı-kúıi tekseriledi, ekinshi fızıkalyq daıyndyǵy (sporttyq normatıv tapsyrady) jáne sońǵysy UBT-dan jınaǵan baly esepke alynady (kem degende 50 ball).
«Bizdiń ınstıtýt 50 jyldyń ishinde 5 myńnan astam túlekti ushyrdy, jylyna shamamen 100-den astam maman daıarlaımyz», - deıdi podpolkovnık Sábıt Kýrtaev.
Onyń aıtýynsha, áskerı ushqyshtar memlekettik tapsyrys boıynsha daıarlanady. Sondyqtan da kelisimshart boıynsha keminde 10 jyl áýe qorǵanysy kúshterinde qyzmet etýi tıis. Kelisim merzimi bitken soń azamattyq avıatsııada aýysý múmkindigi bar.