Elimizde jeke adamdar avtokólik pen baspanany lızıngke alýy múmkin

<p>ASTANA. KAZINFORM &ndash; QR Ulttyq ekonomıka mınıstrligi jeke tulǵalar úshin qarjy lızıngin engizýge qatysty túsinik berdi.</p>

«Halyqtyń shamadan tys kredıt alý deńgeıin tómendetý jáne azamattardyń áleýmettik ıgiligi maqsatynda jeke tulǵalar úshin lızıng engizý máselesi pysyqtalyp jatyr. Qazir QR Parlamenti Májilisiniń depýtattary zańnamalyq aktilerge jeke kásipker sanalmaıtyn jeke tulǵalar úshin lızıng engizýdi kózdeıtin ózgerister men tolyqtyrýlar blogyna bastama jasady. Bul túzetýler Úkimetpen kelisý rásiminen ótip jatyr», - delingen Ulttyq ekonomıka mınıstrliginiń Kazinform agenttigine bergen jaýabynda.

Bastama jasalǵan túzetýler jeke kásipker sanatyna jatpaıtyn jeke tulǵalardy qosý esebinen, ıaǵnı lızıng alýshy uǵymyn keńeıtý arqyly jeke adamdarǵa arnalǵan lızıng engizýge baǵyttalǵan.

«Túzetýlerde jeke tulǵalardyń sharttary boıynsha lızıng nysany retinde memlekettik tirkeýge jatatyn jeke turǵyn úı, páter, avtomobıl bolýy múmkin dep eskerilgen», - dep atalyp ótken vedomstvo habarlamasynda.

Atap aıtqanda, merzimi ótken boryshtyń mólsherin shekteý úshin tólemdi keshiktirý 90 kúnnen asqannan keıin lızıng sharty boıynsha syıaqy men turaqsyzdyq aıybyn esepteýge tyıym salý qarastyrylǵan. Sondaı-aq túzetýler jobasynda lızıng alýshylardyń quqyqtaryn qorǵaý jónindegi normalar qamtylǵan.