Elimizde jasóspirimderdi 12 jastan qylmystyq jaýapqa tartý usynyldy

<p>ASTANA. KAZINFORM &ndash; Májilis depýtaty Magerram Magerramov kámelet jasyna tolmaǵandar úshin qylmystyq jaýapkershilikti 14-ten 12 jasqa deıin tómendetýdi usyndy.</p>

Depýtat óz saýalynda Ulybrıtanııany mysalǵa keltirip, atalǵan elde kámeletke tolmaǵandarǵa qylmystyq jaýapkershilik jasynyń qaıta qaralǵanyn aıtty. Onyń aıtýynsha, balalardyń qoǵamǵa beıimdelý protsesi mektepten bastalady. Osy oraıda óskeleń urpaqtyń destrýktıvti minez-qulqynyń aldyn alýda ustazdardyń yqpaly zor.

«Zorlyq-zombylyqty túp-tamyrymen joıý qajet, ókinishke qaraı, kámeletke tolmaǵan agressorlar jas erekshelikterine baılanysty jazasyz qalyp jatyr. Bálkim, Ulybrıtanııanyń úlgisi boıynsha, bizge de qylmystyq jaýapkershilikke tartylatyn jas shegin qaıta qaraýymyz kerek shyǵar. Keıbir qylmys túrlerin, mysaly zorlaý faktisi boıynsha jaýapkershilikti 14 jastan emes, 12 jastan bastap qarastyrý», - dedi M.Magerramov depýtattyq saýal joldaı otyryp.

Onyń paıymdaýynsha, bul máselede halyqaralyq tájirıbege júgingen jón.

«Mysaly, Japonııada Bilim mınıstrligi qorqytyp-úrkitip, qorlaýǵa qarsy kúres jónindegi arnaıy keńes qurdy. Onyń qyzmeti balalar úshin qaýipsiz orta qurý úshin eresekterdiń jaýapkershiligin arttyrýǵa baǵyttalǵan», - dep atap ótti májilismen.

Sondaı-aq, halyq qalaýlysy kámeletke tolmaǵandarǵa quqyqtyq tárbıe berýdiń arnaıy ádisin engizýdi jáne ol týraly balalar men jasóspirimderdi keńinen habardar etýdi alǵa tartty.

Depýtat jasóspirimniń krımınogendik minez-qulqynyń qalyptasýyna moraldyq, quqyqtyq jáne basqa da áleýmettik formalardyń biryńǵaı júıesiniń bolmaýy áser etedi. Odan bólek, M.Magerramovtyń málimdeýinshe, qoǵamda bolyp jatqan oqıǵalar, áskerdegi ólim, býllıng, álimjettik basqa da zorlyq-zombylyq jasóspirimniń psıhıkasy men is-áreketine tikeleı yqpaly bar.