Elimizde ulttyq sport — báıge qalaı damyp keledi

<p>Qazaqtyń ulttyq oıyny - at báıgesi elimizde jaqsy damyp keledi. Alaıda, birqatar máseleler de joq emes. Bul týraly Qazaqstan báıge federatsııasynyń prezıdenti Qanat Kópbaev aıtty, dep habarlaıdy QazAqparat tilshisi.&nbsp;</p>

Spıkerdiń sózinshe, elimizde báıgeniń damýyna memlekettiń qoldaýy qajet.

"Mysaly, shetelde jylqylardyń "sportqa arnalǵan jylqylar" degen túri bar. Olar tek at jarystaryna qatysady. Bizdiń elde de jylqylar solaı sanatqa bólingeni durys. Ekinshiden, elimizdiń Aýyl sharýashylyǵy mınıstrligi "asyl tuqymdy" dep shetelden iri-qara malyn ákelip jatady. Ol úshin dotatsııa da beriledi. Menińshe, jylqyny da solaı shetelden elge ákelgen durys, sebebi, jylqynyń da tuqymyn asyldandyrý kerek", - deıdi Qanat Kópbaev.

Ol báıgege qatysatyn shabandoz ben jylqynyń tıisti qujattary bolýy tıis ekenin aıtty.

"Shabandozdyń báıgege qatysýǵa arnalǵan tıisti qujattary durys bolýy kerek, ata-anasynyń ruqsaty da kerek. Ári shabandoz saqtandyrylǵan bolýy kerek. Sonymen birge, báıgege qatysatyn jylqynyń pasporty bolýǵa tıis. ıAǵnı, eger jylqy elimizdiń jylqysy bolsa, onda oǵan elimizdiń pasporty, jylqy shetelden ákelingen bolsa, halyqaralyq pasporty bolýy kerek", - dedi spıker.

Buryn tarıhta alaman, qunan báıge, taı jarystary bolǵan. Búginde báıge túrlerine ózgerister engizilgen.

"Búgingi kúni biz taı jarysyn alyp tastadyq, sebebi odan atqa kóp zaqym kelip jatady. Mysaly, attyń aıaǵy synady, ary qaraı óspeı qalady jáne t.b. bar. Elimizde qazirgi ýaqytta kóbinese qunan báıge, top báıge, alaman báıge uıymdastyrylady. Odan bólek búginde biz jorǵa jarysyn damytyp kelemiz", - deıdi Qanat Kópbaev.

Elimizde ótetin as, jıyn, toılardaǵy báıgeniń bárine QR báıge federatsııasy jaýapty emes.

"Qazaqta toı, dýman, as degender báıgesiz ótpegen. Búgingi kúni de bul dástúr jalǵasyn tabýda. Alaıda, elimizdiń kez-kelgen óńirinde ótetin as, jıyn, toılarynda ótetin at báıgelerin biz uıymdastyrmaımyz. Olardy jergilikti halyq, azamattar ózderi uıymdastyryp, ózderi jarys jeńimpazdaryna syılyqtaryn usynyp jatady. Eger biz báıge uıymdastyrar bolsaq, onda ol bizdiń óz erejemizge sáıkes ótedi", - dedi Qazaqstan báıge federatsııasynyń basshysy.

Báıgeden el chempıonaty bıyl naýryz aıynda bastalǵan eken.

"Búgin Almatyda báıgeden el chempıonatynyń fınalyn ótkizdik. Negizi báıgeden Qazaqstan chempıonaty bıyl naýryz aıynda bastalǵan bolatyn. Ol boıynsha elimizdiń 7 aımaǵynda irikteý kezeńderi ótti. Búgingi fınaldyq jarysqa elimizdiń ár óńirinen 160-tan astam tulpar men shabandoz qatysty. Jarystyń jalpy júlde qory 82 500 000 teńgeni qurady. Jarys báıgeniń 7 túri: qunan báıge, top báıge, alaman báıge, jorǵa jarys, Qazaqstanda týǵan qunandar báıgesi, uly alaman jáne eki jasar tulparlar arasyndaǵy ushqyr báıge boıynsha ótti. Jarystyń eń jas shabandozy Almaty oblysynan kelgen Islamnur esimdi 8 jastaǵy shabandoz boldy. Aıta keteıin, búgingi tańda elimizde Jumyrtuıaq, Talhız, Moı mır, Sekret esimdi tulparlar úzdikter qatarynan únemi kórinip júr", - dedi ol.

Spıker sondaı-aq Almatyda ótken báıge jartysynda alǵash ret "Uly alaman" báıgesi ótkenin, onyń uzyndyǵy 35 shaqyrym bolǵanyn aıtty. Oǵan eń kóp tulpar, búkil Qazaqstannan jıyny 55 tulpar qatysty.

«At sporty, onyń ishinde báıge — halqymyzdyń ejelden kele jatqan qundy dástúri. Báıge bizdiń qanymyzda bar. Bul tek sport túri ǵana emes, erekshe mádenıet pen ónerdiń, bizdiń ata-babalarymyzdan qalǵan asyl mura. Bizdiń mindetimiz – ulttyq sportty damytý jáne nasıhattaý bolyp tabylady", - dep qorytyndylady Qazaqstan báıge federatsııasynyń prezıdenti Qanat Kópbaev.

Eske salaıyq búgin Almatyda báıgeden Qazaqstan chempıonatynyń fınaldyq kezeńi ótti.