Elimizde týý kórsetkishi joǵary óńirler ataldy

<p>ASTANA. KAZINFORM &ndash; QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy, Mádenıet jáne aqparat mınıstri Aıda Balaeva elimizde týý kórsetkishiniń artqanyn aıtty. Sonymen qosa halyq sanynyń artýy memleket aldyna jańa mindetterdi qoıyp otyr.</p>

«Memleket basshysy demografııalyq ózgeristerdi boljap, olardyń saldarymen kúresý úshin ýaqtyly sharalar qabyldaý qajettigin basa aıtty. Elimizdiń demografııalyq damý salasyndaǵy tendentsııalarǵa toqtalsaq, 2021 jyly sońǵy 34 jyldaǵy eń joǵary týý kórsetkishine qol jetkizdik. Búginde Almaty, Shymkent, Astana qalasy jáne Túrkistan, Mańǵystaý oblysynda halyq sanynyń ósimi jaqsy deýge bolady. Al Qostanaı, Soltústik Qazaqstan oblystarynda adam azaıǵan. Halyq sany ortasha deńgeıde ósýi Qyzylorda jáne Atyraý oblysyna tıesili», - dedi Aıda Balaeva Senatta ótken Úkimet saǵatynda.

Onyń aıtýynsha, keıingi jyldary elimizde týý kórsetkishi rekord ornatqan.

«Halyq tyǵyz ornalasqan jáne sany artyp jatqan aımaqtar boıynsha memlekettiń aldynda kóptegen áleýmettik jáne ekonomıkalyq mindetter tur. Elimizdiń demografııalyq damýyna áser etetin ana men bala ólimin azaıtý, otbasyn qoldaý, ajyrasýdyń aldyn alý sekildi máseleler Ulttyq komıssııanyń erekshe baqylaýynda», - deıdi ol.

Buǵan deıin Aıda Balaeva qazaqstandyqtar bala tárbıesinde qandaı qundylyqtarǵa mán beretini týraly saýalnama nátıjesimen bólisken edi.