Elimizde tikeleı sheteldik ınvestıtsııa kólemi tómendedi

<p>ASTANA. KAZINFORM &ndash; Ótken jyly elimizge tartylǵan tikeleı sheteldik ınvestıtsııa kóleminiń tómendegeni baıqaldy. Bul týraly Májilistiń Halyqaralyq ister, qorǵanys jáne qaýipsizdik komıtetiniń otyrysynda Syrtqy ister mınıstriniń orynbasary Nazıra Nurbaeva aıtty.</p>

«2023 jyldyń úsh toqsanynyń qorytyndysy boıynsha tikeleı sheteldik ınvestıtsııanyń jalpy aǵyny 2022 jylǵy uqsas kezeńmen salystyrǵanda 11,3 paıyzǵa tómendep, shamamen 20 mlrd AQSh dollar boldy. Bul kórsetkish sońǵy bes jyldaǵy uqsas kezeńdegi tikeleı sheteldik ınvestıtsııa aǵynynyń ortasha deńgeıinen 9 paıyzǵa joǵary», - dedi mınıstr orynbasary.

Mınıstrlik usynǵan málimetterge qaraǵanda, ótken jyldyń 9 aıynda 5 salaǵa tikeleı sheteldik ınvestıtsııa kóp tartylǵan. Naqtyraq aıtqanda, taý-ken ónerkásibine 8,6 mlrd, óńdeý ónerkásibine 3,9 mlrd, kóterme jáne bólshek saýdaǵa 3,8 mlrd, kólik jáne qoımalaýǵa 855 mln, qurylysqa 413 mln dollar ınvestıtsııa salynǵan.

Onyń atap ótýinshe, Úkimettiń strategııalyq mindeti JІÓ kólemin eki esege, ıaǵnı, 2029 jylǵa qaraı 450 mlrd dollarǵa deıin ulǵaıtý jáne keminde 150 mlrd dollar ınvestıtsııa tartý úshin qolaıly ınvestıtsııalyq ahýaldy qamtamasyz etý, ekonomıkany ártaraptandyrý jáne óńdeý ónerkásibin joǵary qaıta bólý jáne damytý klasterlerin qurý maqsatynda tikeleı ınvestıtsııalardy tartý jónindegi kúsh-jigerdi ulǵaıtý. Ol úshin Ulttyq ekonomıka men syrtqy ister mınıstrlikteri birlesip, ınvestıtsııalar tartýdyń tutas ekojúıesin qalyptastyrý jumysyn júrgizip jatyr. Qazirgi ýaqytta úsh deńgeıli – «shet elderdegi mekemeler – ortalyq – óńirler» júıesi paıdalanylady. Onda syrtqy deńgeıde áleýetti sheteldik ınvestorlarmen tikeleı bastapqy baılanys ornatatyn Qazaqstannyń 109 shet eldegi mekemesi jumyldyrylǵan.