Elimizde temirjoldy 2030 jylǵa deıin damytý tujyrymdamasy qabyldandy

<p>ASTANA. KAZINFORM — Tujyrymdamanyń jobasy osy kóktemde qoǵamdyq talqylaýǵa usynylǵan bolatyn. Atalǵan qujat memleket pen qoǵam úshin temirjol kóligi jumysynyń ońtaıly júıesin qalyptastyrýǵa baǵyttalǵan. </p>

Ekonomıkanyń ınfraqurylymdyq fýnktsııalaryn oryndaıtyn temirjol salasy búgingi tańda birqatar máselege tap bolyp otyr.

Óz kezeginde temirjol salasyn damytýdyń 2030 jylǵa deıingi tujyrymdamasy negizgi mindetterdi kezeń-kezeńimen sheshýdi kózdeıdi.

Atap aıtqanda, óndiristiń negizgi quraldaryn jańartý jáne jańǵyrtý sııaqty mańyzdy tarmaqtar qarastyrylǵan.

Aıta keterligi, temirjol kóligi búkil júk aınalymynyń jartysyn jáne eksporttyq ári tranzıttik júkterdiń basym bóligin tasymaldaýdy qamtamasyz ete otyryp, el ekonomıkasynyń damýy barysynda mańyzdy ról atqarady.

Jolaýshylar tasymaly týraly aıtatyn bolsaq, búgingi tańda tasymaldaýmen 14 kompanııa, onyń ishinde 1 ulttyq jáne 13 jeke kompanııa aınalysady.

Ulttyq tasymaldaýshy jolaýshylardy 100-den astam baǵyt boıynsha temirjol kóligimen tasymaldap otyr.

Osy rette temirjol kóligin damytý tujyrymdamasy temirjol kóligimen júk jáne jolaýshylar tasymaly salasyndaǵy qazirgi jaǵdaıdy taldaý negizinde jasalǵan.

Mańyzdy qujatty ázirleý barysynda kórshi elderdiń tasymaldaý salasyndaǵy reformalary zerdelenip, temirjol salasynyń qoldanystaǵy ınstıtýtsıonaldyq jáne retteýshi modeli qaralǵan.

Strategııalyq qujat sheńberinde salaǵa jeke ınvestıtsııalardy tartý, jyljymaly quramnyń básekelestik naryǵy sýbektileriniń jańarýy, jańa jeliler salýdyń iri jobalaryn iske asyrý jáne jeke kompanııalardyń jolaýshylardy tasymaldaý tetigin jetildirý jónindegi is-sharalar kesheni iske asady.

Qazaqstannyń temirjol kóligin damytý tujyrymdamasy respýblıkalyq bıýdjet, «Qazaqstan temir joly» ulttyq kompanııasy jáne jeke ınvestıtsııa esebinen iske asady dep josparlanyp otyr.

Atalǵan tujyrymdama 2024 jylǵy 9 shilde kúni «Atameken» Ulttyq kásipkerler palatasynyń logıstıka jáne tasymaldaý komıtetiniń temirjol kóligi jónindegi qosalqy komıtetiniń QTJ, qaýymdastyq jáne bıznes-qoǵamdastyq ókilderiniń qatysýymen ótken otyrysynda tanystyryldy.