Elimizde sýarý maýsymy aıaqtaldy

<p>ASTANA. KAZINFORM — Qazaqstannyń barlyq aımaǵynda sýarý maýsymy aıaqtaldy. Vegetatsııa kezeńi 1 sáýirde bastaldy. Bul týraly Úkimettiń baspasóz qyzmeti habarlady.</p>

Sýarý kezeńinde Sý resýrstary jáne ırrıgatsııa mınıstrligi sharýalarǵa shamamen 11,2 mlrd tekshe metr sý berdi.

Bıyl mınıstrlikke qarasty «Qazsýshar» kásipornynyń fılıaldary sharýa qojalyqtarymen 25 myńǵa jýyq kelisimshart jasady.

Sý tutyný kólemi boıynsha kósh basynda — Qyzylorda oblysy. Óńirdiń dıhandaryna shamamen 3,7 mlrd tekshe metr sý berildi. Túrkistan oblysynyń sharýalary 3,4 mlrd tekshe metr sý aldy. Jetisý oblysynyń dıhandaryna 1,37 mlrd tekshe metr sý berilse, Almaty oblysynyń sharýalary 1,57 mlrd tekshe metr sý paıdalandy.

«Úkimet tótenshe jaǵdaı men sýarmaly sý tapshylyǵynyń aldyn aldy. Biz byltyrǵy tájirıbeden sabaq alyp, fermerlerge sýarmaly sýdyń úzdiksiz jetkizilýin qamtamasyz ettik. Sý dıplomatııasy da mańyzdy ról atqardy. Bıyl Úkimettiń tabysty kelissózderi arqasynda elimizge Ózbekstan, Qyrǵyzstan jáne Tájikstan bastapqyda josparlanǵan kólemnen de artyq sý jiberdi», — dep atap ótti sý resýrstary jáne ırrıgatsııa mınıstri Nurjan Nurjigitov.

Búgingi tańda Úkimet sý tasqyny kezeńine daıyndyqty bastady. Elimizdiń soltústik, batys, shyǵys jáne ortalyq aımaqtaryndaǵy sý qoımalarynan sý jiberile bastady. Al, ońtústik oblystardaǵy sý qoımalary, sý jınaý rejıminde jumys istep jatyr.

Ortalyq Azııanyń memleketaralyq sý sharýashylyǵyn úılestirý komıssııasynyń kelesi otyrysynda Naryn-Syrdarııa sý qoımalary kaskadynyń boljamdy jumys kestesi jasalady jáne kelesi jylǵa sý berý kólemi bekitiledi.

Aıta keteteıik, sýarý maýsymy bastalǵaly 12 myń sharýaǵa eki mlrd tekshe metr sý berildi.

Sondaı-aq, Ózbekstan sýarý maýsymynyń sońyna deıin Qazaqstanǵa taǵy 500 mln tekshe metr sý jiberetini aıtyldy.