Elimizde shahmatty damytýdyń bes jyldyq jospary bekitildi — Oljas Bektenov

<p>ASTANA. KAZINFORM &ndash; Astanada jalaýyn jelbiretetin rapıd jáne blıts boıynsha shahmattan álem chempıonatynyń alaý estefatasyn jaǵý rásimine qatysqan QR Premer-mınıstri Oljas Bektenov elimizde shahmatty damytýdyń bes jyldyq jospary bekitilgenin atap ótti.</p>

«Memleket basshysy elimizdegi shahmattyń damýyna erekshe kóńil bólip otyr. Búginde elimizde 200 myńnan astam adam shahmatpen aınalysady. Bes jyldyq josparǵa sáıkes, shahmatpen shuǵyldanatyndardyń sany eki ese artady dep josparlanǵan. Búginde Halyqaralyq shahmat federatsııasy bedeldi uıymǵa aınalyp otyr. Barsha shahmat súıer qaýymdy atalǵan ujymnyń 100 jyldyǵymen, shahmat Olımpıadasynyń 45 jyldyǵymen shyn júrekten quttyqtaımyn», - dedi Oljas Bektenov.

Aıta keteıik, dál qazir Astanada rapıd jáne blıts boıynsha (FIDE World Rapid and Blitz Team Championships 2024) shahmattan álem chempıonatynyń saltanatty ashylýy ótedi. Júldege álemniń túkpir-túkpirinen kelgen 39 komanda talasatynyn atap ótken jón.

Jarystyń júlde qory – 350 myń eýro. Astanaǵa álemniń eń úzdik shahmatshysy Magnýs Karlsenniń kelýi jarystyń mártebesin arttyra túskeni anyq.

Qazaqstan shahmat federatsııasynyń atqarýshy dırektory Gúlmıra Dáýletovanyń aıtýynsha, 39 komandanyń 20-y — qazaqstandyqtar. Osylaısha, jergilikti shahmatshylardyń tájirıbe jınaqtaýyna múmkindik berilip otyr.