Elimizde pornografııa taratýdyń 6 faktisi tirkeldi – ІІM resmı ókili

<p>ASTANA. KAZINFORM &ndash; QR Іshki ister mınıstrligi mamandary kıberqylmyspen kúresý úshin jańa ádisterdi qoldanýǵa kúsh salyp otyr. Olardyń aıtýynsha, qylmyskerler ýaqyt ótken saıyn aıla-tásilderin jańartyp otyr.</p>

Іshki ister mınıstrliginiń resmı ókili Shyńǵys Álekeshevtiń málimetinshe, 13-15 tamyz aralyǵynda respýblıka aýmaǵynda «Anti-fraud» jedel-aldyn alý is-sharasy uıymdastyrylǵan.

Osy kezeńde «izin sýytpaı» 178 qylmys ashylǵan. Atap aıtsaq:

- avtorlyq jáne sabaqtas quqyqtardy buzý (QK 198-baby) - 3 fakt;
- aqparatqa zańsyz qol jetkizý (QK 205-baby) - 1 fakt;
- abonenttik qurylǵynyń sáıkestendirý kodyn zańsyz ózgertý (QK 213-baby) - 4 fakt;
- pornografııany taratý (QK 311-baby) - 6 fakt;
- arnaıy tehnıkalyq quraldardy taratý (QK 399-baby) - 2 fakt;
- ІT-tehnologııalardy paıdalana otyryp urlyq jasaý (QK 188-baby)- 5 fakt;
- ınternet paıdalanýshylaryna qatysty alaıaqtyq – 157 fakt.

«Sonymen qatar, polıtsııa qyzmetkerleri buryn jasalǵan 328 qylmysty ashty. Erkin aınalymda júrgen 485 tyıym salynǵan ónim tárkilendi. Almaty qalasyndakórshiles eldiń 24 jastaǵy azamaty ustaldy. Ol páterde SIM-box qurylǵysyn ornatyp, el aýmaǵynda alaıaqtyq qońyraý shalý qyzmetin usynǵan. Sondaı-aq, Semeı qalasynda vırtýaldy abonenttik nómirlerdi tirkeýge arnalǵan GSM-box apparatýrasyn jaldamaly páterde ornatyp, uıaly baılanys jelilerine qosqan taǵy bir sheteldik ustaldy. 22 jastaǵy jigit Telegram-arna arqyly kýratordan túsken nusqaýlardy oryndaǵan. Jalpy, is-sharany ótkizý kezinde respýblıkanyń úsh qalasynda barlyǵy 4 SIM-box qurylǵysy jáne 6 myńǵa jýyq sim-karta tárkilenip, joıyldy. Barlyq faktiler boıynsha tergeý júrgizilip jatyr. Kúdiktilerdiń áreketinen zardap shekken adamdar anyqtalyp jatyr», - dedi Sh. Álekeshev.

Onyń aıtýynsha, sońǵy kezde alaıaqtar memlekettik organdar men iri jeke uıymdar basshylarynyń atynan jalǵan akkaýnttar ashyp, adamdardy aldaý faktileri jıilep ketken. Ókinishke qaraı, turǵyndarǵa túsindirý jumystary júıeli júrgizilse de, áli kúnge deıin alaıaqtardyń quryǵyna túskender azaımaı tur.