Elimizde páter jáne múlik ıeleri kooperatıvine jaýapkershilik kúsheıedi
Májilistiń qaraýyna «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy engizildi.
«Atalǵan zań jobasy Qazaqstan Respýblıkasy Parlamenti depýtattarynyń bastamasymen ázirlendi. Zań jobasynyń maqsaty – turǵyn úı qoryn basqarý jónindegi qyzmetti jetildirý, basqarý protsesterin tsıfrlandyrý. Páter ıeleri kooperatıvteri men múlik ıeleri birlestikterine arnalǵan biryńǵaı talaptardy belgileý. Sonymen qatar turǵyn úı ınspektsııalarynyń fýnktsııalaryn keńeıtý», - dedi Ekonomıkalyq reforma jáne óńirlik damý komıtetiniń hatshysy Ekaterına Smyshlıaeva Májilistiń jalpy otyrysynda.
Onyń aıtýynsha, zań jobasynda turǵyn úılerdi basqarý sýbektilerine salyq salý tártibi aıqyndalady.
«Sondaı-aq, úılerdi basqarý júıesine qatysýshylarǵa ákimshilik jaýapkershilik kúsheıtiledi. Zań jobasyn jumysqa alýǵa jáne olar boıynsha qorytyndy ázirleýge daıynbyz», - deıdi ol.